ភ្នំពេញ៖ ប្រមុខរាជរដ្ឋាភិបាលកម្ពុជាបានចាត់ទុកការកើនឡើងនៃអតិផរណាជាការគួរឱ្យព្រួយបារម្ភខណៈបញ្ហានេះកំពុងធ្វើឱ្យប៉ះពាល់ដល់ជីវភាពរស់នៅប្រចាំថ្ងៃរបស់ប្រជាជនទាំងមូល។ សម្ដេចតេជោ ហ៊ុន សែន នាយករដ្ឋមន្រ្តីកម្ពុជាបានមានប្រសាសន៍បែបនេះនៅក្នុងពិធីប្រគល់-ទទួលអំណោយវ៉ាក់សាំងកូវីដ-១៩ (Pfizer) ពីប្រទេសអេស្ប៉ាញនៅវិមានសន្តិភាពនាព្រឹកថ្ងៃទី១៨ ខែសីហា ឆ្នាំ២០២២នេះ។

សម្ដេចនាយករដ្ឋមន្រ្តីកម្ពុជាបានមានប្រសាសន៍លើកឡើងថា ស្របពេលដែលជំងឺកូវីដៃ-១៩បានថមថយតែមិនទាន់បានបញ្ចប់នៅឡើយទេហើយសកលលោកទាំងមូល ក៏កំពុងជួបប្រទះនឹងបញ្ហាប្រឈមដ៏គួរឱ្យព្រួយបារម្ភជាច្រើនផ្សេងទៀត ដែលអាចបន្ទុចបង្អាក់សន្ទុះនៃការងើបឡើងវិញនៃសង្គម-សេដ្ឋកិច្ចសកល ។

សម្ដេចតេជោ ហ៊ុន សែន បានមានប្រសាសន៍បន្តថា ជាក់ស្ដែងការកើនឡើងនៃថ្លៃប្រេងឥន្ធនៈបានបង្កឱ្យមានអតិផរណាខ្ពស់នៅគ្រប់ទីកន្លែងជាពិសេសសហរដ្ឋអាមេរិក និងសហភាពអ៊ឺរ៉ុប ដែលបានជំរុញឱ្យធនាគារកណ្តាលត្រូវបង្ខំចិត្តដំឡើងអត្រាការប្រាក់ដើម្បីទប់ស្កាត់ការបន្តកើនឡើងនៃអតិផរណា ដែលការណ៍នេះ អាចនឹងធ្វើឱ្យតម្រូវការសកលធ្លាក់ចុះខណៈអតិផរណាខ្ពស់កំពុងដាក់សម្ពាធកាន់តែខ្លាំងឡើងមកលើជីវភាពរស់នៅប្រចាំថ្ងៃរបស់ប្រជាជនផងដែរ។

យ៉ាងណាក៏ដោយសម្ដេចតេជោ ហ៊ុន សែន នាយករដ្ឋមន្រ្តីកម្ពុជាបានគួសបញ្ជាក់ថា ស្ថិតក្នុងកាលៈទេសៈដ៏លំបាកនេះគឺត្រូវការជាចាំបាច់នូវកិច្ចសហប្រតិបត្តិការនិងការចេះជួយគ្នាទៅវិញទៅមក៕