ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានចាត់ទុកសុខុមាលភាពរបស់ប្រជាជន និងសុខភាពសាធារណៈជាអាទិភាពខ្ពស់បំផុតដោយប្រកាន់ខ្ជាប់ជានិច្ចនូវស្មារតីជួយគ្នាទៅវិញទៅមក និងពង្រឹងកិច្ចសហប្រតិបត្តិការលើគ្រប់វិស័យ។

ថ្លែងក្នុងពិធីប្រគល់-ទទួលអំណោយ វ៉ាក់សាំងកូវីដ-១៩ (Pfizer) ពីប្រទេសអេស្ប៉ាញនៅវិមានសន្តិភាពនាព្រឹកថ្ងៃទី១៨ ខែសីហា ឆ្នាំ២០២២នេះសម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា ស្ថិតក្នុងកាលៈទេសៈដ៏លំបាកនិងពិបាកប៉ាន់ប្រមាណនេះយើងត្រូវការជាចាំបាច់នូវកិច្ចសហប្រតិបត្តិការ និងការចេះជួយគ្នាទៅវិញទៅមកជាងពេលណាៗទាំងអស់ហើយបានលើកទឹកចិត្តឱ្យមានការចាត់ទុកសុខុមាលភាពរបស់ប្រជាជន និងសុខភាពសាធារណៈជាអាទិភាពខ្ពស់។

សម្តេចតេជោ ហ៊ុន សែន បានលើកឡើងដែរថា ក្នុងនាមជាប្រធានអាស៊ាននៅក្នុងឆ្នាំ២០២២នេះកម្ពុជានឹងខិតខំពង្រឹងសហប្រតិបត្តិការនៅក្នុងតំបន់អាស៊ានក៏ដូចជារវាងអាស៊ាន-សហភាពអឺរ៉ុបនិងរវាងអាស៊ាន-អេស្ប៉ាញផងដែរ។

សូមបញ្ជាក់ដែរថា នៅក្នុងពិធីនេះសម្តេចនាយករដ្ឋមន្ត្រី ហ៊ុន សែន ក៏បានចាត់ទុកការផ្តល់ជំនួយវ៉ាក់សាំងកូវីដ-១៩ប្រភេទ Pfizer សម្រាប់កុមារ ចំនួន ៣០០.០០០ ដូស ពីប្រជាជននិងរដ្ឋាភិបាលនៃព្រះរាជាណាចក្រអេស្ប៉ាញជូនដល់ប្រជាជន និងរាជរដ្ឋាភិបាលកម្ពុជាថា ជាការសម្រេចចិត្តដ៏ត្រឹមត្រូវនិងម៉ឺងម៉ាត់របស់រាជរដ្ឋាភិបាលក្នុងការរៀបចំយុទ្ធនាការជាតិចាក់វ៉ាក់សាំងក្នុងក្របខណ្ឌទូទាំងប្រទេសជូនដល់ប្រជាជនជាពិសេសកុមារដែលជាទំពាំងស្នងឫស្សីនិងជាអនាគតនៃប្រទេសជាតិខណៈកម្ពុជាអាចត្រូវបានចាត់ទុកថា ជាប្រទេសឈានមុខមួយក្នុងគ្រប់គ្រងការឆ្លងរាលដាលនៃជំងឺកូវីដ-១៩ បានយ៉ាងល្អប្រសើរ៕