ព្រះសីហនុ៖ រដ្ឋបាលខេត្តព្រះសីហនុ បានបង្កើតក្រុមការងារចម្រុះចុះវាស់វែងកំណត់ព្រំដីរបស់ក្រុមហ៊ុន សីហនុវីល កោសល ស៊ឺខននីមី ហ្សូន នៃតំបន់សេដ្ឋកិច្ចពិសេសក្រុងព្រះសីហនុ (SIHANOUK VILLE SEZ) ក្រោយពេលមានករណីទន្ទ្រានសង់ខ្ទមចំនួនរាប់រយខ្នង។

យោងសេចក្ដីប្រកាសព័ត៌មានរបស់រដ្ឋបាលខេត្តព្រះសីហនុបានឱ្យដឹងថា មានប្រជាពលរដ្ឋមួយចំនួនបានចូលទៅទន្ទ្រានកាន់កាប់និងសង់ខ្ទមមិនរៀបរយលើទីតាំងដីរបស់ក្រុមហ៊ុន សីហនុវីល កោសល ស៊ឺខននីមី ហ្សូន នៃតំបន់សេដ្ឋកិច្ចពិសេសក្រុងព្រះសីហនុ (SIHANOUK VILLE SEZ) ដែលទង្វើនេះបានបង្កឱ្យមានភាពអនាធិបតេយ្យទន្ទ្រានកាន់កាប់ដីធ្លីដោយខុសច្បាប់នៅក្នុងភូមិសាស្ត្រខេត្តព្រះសីហនុ។

សេចក្ដីប្រកាសព័ត៌មានបានឱ្យដឹងទៀតថា អំឡុងពេលដែលអាជ្ញាធរមូលដ្ឋានមមាញឹកក្នុងការរៀបចំការពារសន្តិសុខសណ្តាប់ធ្នាប់សម្រាប់ពេលបោះឆ្នោតដែលបានប្រព្រឹត្តទៅកាលពីថ្ងៃទី៥ ខែមិថុនា ឆ្នាំ២០២២ ស្រាប់តែមានមេខ្យល់បានបំផុសបំផុលប្រជាពលរដ្ឋឱ្យចូលទៅទន្ទ្រាន និងសង់ខ្ទមរាប់រយខ្នងនៅលើទីតាំងដីដែលមានប័ណ្ណសម្គាល់សិទ្ធិកាន់កាប់អចលនវត្ថុរបស់ក្រុមហ៊ុន សីហនុវីល កោសល ស៊ឺខននីមី ហ្សូន នៃតំបន់សេដ្ឋកិច្ចពិសេសក្រុងព្រះសីហនុ។

រដ្ឋបាលខេត្តព្រះសីហនុបានអំពាវនាវដល់ប្រជាពលរដ្ឋដែលចាញ់បោកមេខ្យល់ ឱ្យស្ម័គ្រចិត្តចាកចេញពីទីតាំងដីដោយខ្លួនឯងខណៈអ្នកដែលនៅពីក្រោយខ្នងនៃអំពើញុះញង់នឹងត្រូវចាត់វិធានការផ្លូវច្បាប់យ៉ាងតឹងរឹងដោយមិនមានការលើកលែង។

រដ្ឋបាលខេត្តព្រះសីហនុបានបញ្ជាក់ដែរថា ក្រុមការងារចម្រុះមួយត្រូវបានបង្កើតឡើងកាលពីថ្ងៃទី៩ ខែសីហា ឆ្នាំ២០២២ ដើម្បីចុះវាស់វែងកំណត់ព្រំដីឈូសឆាយ សម្អាតដីនិងធ្វើការចុះរុះរើខ្ទមមិនរៀបរយលើទីតាំងដីខាងលើនាពេលខាងមុខ៕