ខេត្តបាត់ដំបង៖ ជនអនាថាចំនួនជាង១០០នាក់ទៀត ត្រូវបានអាជ្ញាធរខេត្តបាត់ដំបងបើកប្រតិបត្តិការប្រមូលយកទៅមណ្ឌលស្ថារនីតិសម្បទា ដើម្បីរៀបចំកែលម្អសោភ័ណភាពទីក្រុង។
យោងតាមរបាយការណ៍របស់ស្នងការដ្ឋាននគរបាលខេត្តបាត់ដំបងបានឱ្យដឹងថា ក្នុងប្រតិបត្តិការកាលពីថ្ងៃទី១៤ ខែសីហា ឆ្នាំ២០២២ សមត្ថកិច្ចចម្រុះបានធ្វើការចុះប្រមួលជនប្រើប្រាស់នូវសារធាតុញៀននិងជនអនាថាសរុបចំនួន ១៤៦នាក់។ របាយការណ៍បានឱ្យដឹងបន្តថា ជនអនាថាទាំង១៤៦នាក់ក្នុងនោះរួមមាន៖ អ្នកវិជ្ជមានសារធាតុញៀនសរុបចំនួន ១០០នាក់, អ្នកអវិជ្ជមានសារធាតុញៀនសរុបចំនួន ៤៦នាក់។
សមត្ថកិច្ចបានឱ្យដឹងដែរថា ពួកគេត្រូវបានបញ្ជូនទៅមណ្ឌលស្ថារនីតិសម្បទាពិភពនៃក្តីសង្ឃឹម (កំប្រង់) ស្ថិតនៅស្រុកបវេល ខេត្តបាត់ដំបង និងមួយចំនួនទៀត ត្រូវបានបញ្ជូនទៅមន្ទីរសង្គមកិច្ច ខេត្តបាត់ដំបង (ស្ត្រីមានផ្ទុកសារធាតុញៀន កុមារគ្មានសារធាតុញៀន)។
សូមបញ្ជាក់ថា នាពេលថ្មីៗនេះលោក សុខ លូ អភិបាលខេត្តបាត់ដំបងបានណែនាំដល់រដ្ឋបាលក្រុងបាត់ដំបងឱ្យប្រមូលជនអនាថា ជនញៀនថ្នាំជនដែលមានសតិមិនគ្រប់ឱ្យអស់ ដើម្បីរក្សាសោភ័ណភាពក្រុងបាត់ដំបងឱ្យមានរបៀបរៀបរយមិនប៉ះពាល់ដល់ការរស់នៅរបស់ប្រជាពលរដ្ឋនិងមិនប៉ះពាល់ដល់ភ្ញៀវទេសចរជាតិ និងអន្តរជាតិ មកទស្សនាខេត្តបាត់ដំបង៕
