ភ្នំពេញ ៖ ស្នងការនគរបាលរាជធានីភ្នំពេញ បានប្រជុំកងកម្លាំងប្រមាណ៩០០នាក់ ដើម្បីត្រៀមចេញអន្តរាគមន៍ជួយសង្គ្រោះប្រជាពលរដ្ឋក្នុងករណីកើតឡើងនូវគ្រោះទឹកជំនន់រឺគ្រោះមហន្តរាយធម្មជាតិផ្សេងៗ។
ការត្រៀមអន្តរាគមន៍នេះបានធ្វើឡើងនៅគ្រាដែលគេមើលឃើញថា ក្នុងរយៈពេលប៉ុន្មានថ្ងៃចុងក្រោយនេះ មានសេចក្តីរាយការណ៍ឱ្យដឹងថា ស្ថានភាពទឹកជំនន់បានកើតឡើងជាបន្តបន្ទាប់នៅភូមិសាស្ត្រក្នុងបណ្តាខេត្តខ្លះនាភាគឦសាននៃព្រះរាជាណាចក្រកម្ពុជា។
លោកឧត្តមសេនីយ៍ឯក ស ថេត អគ្គស្នងការរងនគបាលជាតិ និងជាស្នងការនគរបាលរាជធានីភ្នំពេញ បានលើកឡើងថា ការប្រជុំជួរនេះគឺជាការត្រួតពិនិត្យកម្លាំងជាក់ស្តែងដើម្បីត្រៀមជួយសង្គ្រោះប្រជាពលរដ្ឋ។
លោកបានលើកឡើងដែរថា ឆ្លងតាមបទពិសោធន៍កន្លងមកគឺក្នុងរាជធានីភ្នំពេញកើតមានគ្រោះទឹកជំនន់ពីរឆ្នាំជាប់គ្នានៅក្នុងខណ្ឌដង្កោ ក៏ដូចជាការឆ្លើយតបចេញជួយអន្តរាគមន៍បង្ការទប់ស្កាត់បញ្ហាជំងឺឆ្លងរាតត្បាតកូវីដ-១៩ ក្នុងសហគមន៍ផងដែរ។
លោកស្នងការនគរបាលរាជធានីភ្នំពេញ បានបញ្ជាដល់ថ្នាក់ដឹកនាំការិយាល័យជំនាញទាំងអស់ ឱ្យគ្រប់គ្រងត្រួតពិនិត្យកម្លាំងនៅក្រោមឱវាទរបស់ខ្លួនឱ្យបានម៉ត់ចត់ បើក្នុងករណីដែលចាំបាច់ត្រូវប្រមូលកម្លាំងចេញជួយអន្តរាគមន៍ជួយសង្គ្រោះ គឺកងកម្លាំងត្រូវមានមុខគ្រប់ចំនួនជាដាច់ខាត ដោយមិនគិតពេលវេលានោះទេ។
ជាមួយគ្នានេះ លោកឧត្តមសេនីយ៍ឯក ស ថេត បានណែនាំដល់កម្លាំងនគរបាលក្រោមបង្គាប់ត្រូវគោរពអនុវត្តឱ្យបាននូវបទបញ្ជា និងវិន័យនគរបាលជាតិ ឱ្យបានខ្ជាប់ខ្ជួន ក្នុងករណីបុគ្គលនគរបាលណាមិនអនុវត្តតាមបញ្ជា និងវិន័យនគរបាលជាតិ នោះទេ នឹងត្រូវទទួលរងវិន័យជាដាច់ខាត៕
អត្ថបទ៖លាង ឡា