ព្រះសីហនុ៖ សាលាដំបូងខេត្តព្រះសីហនុ បានអះអាងថា ការឃុំខ្លួនអតីតកីឡាករប្រដាល់ ឈ្មោះ ជិន រ៉ា ត្រូវបានធ្វើឡើងដោយផ្អែកលើភស្តុតាង ដែលសមត្ថកិច្ចប្រមូលបាន ពាក់ព័ន្ធ   ករណីការចាប់ឃុំឃាំង និងបង្ខាំងមនុស្សដោយខុសច្បាប់ នៅសណ្ឋាគារមួយកន្លែង កាលពីថ្ងៃទី២១ ខែមេសា ឆ្នាំ២០២២។

ការបំភ្លឺរបស់អ្នកនាំពាក្យ សាលាដំបូងខេត្តព្រះសីហនុ បានកើតឡើងបន្ទាប់ពីមានប្រតិបត្តិកម្មពីអ្នកប្រដាល់កម្ពុជា មួយចំនួន និងអំពាវនាវដល់ថ្នាក់ដឹកនាំឱ្យជួយពិនិត្យ និងអន្តរាគមន៍។

សេចក្ដីថ្លែងការណ៍ របស់អ្នកនាំពាក្យ សាលាដំបូងខេត្តព្រះសីហនុ បានឱ្យដឹងនៅព្រឹកថ្ងៃទី១១ ខែសីហា ឆ្នាំ២០២២នេះថា ដើម្បីជៀសវាងការភ័ន្តច្រលំទៅលើចំណាត់ការពាក់ព័ន្ធនឹងករណីខាងលើនេះ អ្នកនាំពាក្យ នៃសាលាដំបូងខេត្តព្រះសីហនុ បានលើកឡើងថា ៖

ទី១៖ ឈ្មោះ ជិន ភារៀង ហៅ ជិន រ៉ា ត្រូវបានសមត្ថកិច្ចចាប់ឃាត់ខ្លួននៅក្នុងហេតុការណ៍ពាក់ព័ន្ធនឹងការចាប់ឃុំឃាំង និងបង្ខាំងមនុស្សដោយខុសច្បាប់ នៅសណ្ឋាគារមួយ ដែលឈ្មោះ ជិន ភារៀង ហៅ ជិន រ៉ា បម្រើការជាសន្តិសុខ ហើយករណីនេះមិនពាក់ព័ន្ធទៅនឹងការបង្ហាត់បង្រៀនគុនខ្មែររបស់ឈ្មោះ ជិន រ៉ា នោះទេ។ ផ្អែកតាមរបាយការណ៍របស់នគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តព្រះសីហនុ បានបញ្ជាក់ថា កាលពីថ្ងៃទី២១ ខែមេសា ឆ្នាំ២០២២ វេលាម៉ោងប្រហែល១០៖០០នាទីព្រឹក គណៈបញ្ជាការឯកភាពខេត្តព្រះសីហនុ រួមជាមួយកម្លាំងជំនាញស្នងការដ្ឋាននគរបាល បានធ្វើការឆែកឆេរ សណ្ឋាគារជីងកាង ក្នុងនោះរកឃើញមានបន្ទប់មួយនៅជាន់ទីពីរ ដែលជាបន្ទប់សម្រាប់បង្ខាំងមនុស្សខុសច្បាប់។

បន្ទាប់ពីការឆែកឆេរបន្ទប់នោះរួច, សមត្ថកិច្ចបានរំដោះនូវជនរងគ្រោះចំនួនពីរនាក់ និងដកហូតសម្ភារសម្រាប់ធ្វើសកម្មភាពបង្ខាំងមនុស្ស រួមមាន៖ ដំបងឆក់ កៅអីមានផ្សាដៃចាប់ជើងវិសចាក់បេតុង និងកាំភ្លើងខ្លីមួយដើមម៉ាក SIG SAUER បង់មួយ គ្រាប់ចំនួនដប់ប្រាំមួយ ដែលលាក់នៅក្នុងទូដែករបស់ជនសង្ស័យ WENG GAO YANG។

តាមចម្លើយបញ្ជាក់របស់ជនសង្ស័យឈ្មោះ WENG GAO YANG ថា កាំភ្លើងនេះ គឺបានមកពីឈ្មោះ ជិន ភារៀង ហៅ ជិន វ៉ ដែលមានតួនាទីជាសន្តិសុខ នៅសណ្ឋាគារជីងកាង និងជាអ្នកយាមកាមមិនឲ្យជនរងគ្រោះរត់ចេញពីបន្ទប់។

ទី២៖ ចំពោះករណីខាងលើនេះ បន្ទាប់ពីទទួលបានសំណុំរឿងពីសមត្ថកិច្ច នៃស្នងការដ្ឋាននគរបាលខេត្តព្រះសីហនុ និងដោយផ្អែកលើភស្តុតាងដែលសមត្ថកិច្ចប្រមូលបាន, អយ្យការអមសាលាដំបូងខេត្តព្រះសីហនុ បានទទួលចាត់ការលើសំណុំរឿងព្រហ្មទណ្ឌលេខ ៣៩៣ ចុះថ្ងៃទី២៤ ខែមេសា ឆ្នាំ២០២២ និងបានសម្រេច បើកការស៊ើបសួរលើអង្គហេតុខាងលើ និងដាក់ឲ្យស្ថិតនៅក្រោមការពិនិត្យលើឈ្មោះ ជិន ភារៀង ហៅ ជិន រ៉ា ភេទប្រុស ពីបទ ចាប់ឃុំឃាំង និងបង្ខាំងមនុស្សដោយខុសច្បាប់ និងកាន់កាប់អាវុធដោយគ្មានការអនុញ្ញាត រួមទាំងជនសង្ស័យ៤នាក់ផ្សេងទៀត និងបានបញ្ជូនសំណុំរឿងបន្តទៅតុលាការ។

នៅក្នុងដំណាក់កាលស៊ើបសួរចៅក្រមស៊ើបសួរ នៃសាលាដំបូងខេត្តព្រះសីហនុ បានបង្គាប់ឲ្យឃុំខ្លួនជនត្រូវចោទទាំងប្រាំខាងលើ ហើយបានបំពេញកិច្ចនីតិវិធីរបស់ខ្លួន ដោយបានធ្វើការកោះហៅជនត្រូវចោទ មកធ្វើការសាកសួរ, កោះហៅជនរងគ្រោះ, សាក្សី និងបានធ្វើលិខិតជូនដំណឹងបិទការស៊ើបសួរ ជូនមកតំណាងអយ្យការរួចហើយផងដែរ។ ទន្ទឹមនេះ នៅក្នុងសំណុំរឿងនេះ មកដល់បច្ចុប្បន្ន ពុំមានជនត្រូវចោទណាមួយ ត្រូវបានធ្វើការដោះលែងឲ្យនៅក្រៅឃុំជាបណ្ដោះអាសន្ននោះទេ។

ទី៣៖ ជាថ្មីម្តងទៀត អ្នកនាំពាក្យ នៃសាលាដំបូងខេត្តព្រះសីហនុ សូមគូសបញ្ជាក់ថា ការចាប់ខ្លួនឈ្មោះ ជិន ភារៀង ហៅ ជិន រ៉ា គឺពាក់ព័ន្ធនឹងបទ ចាប់ឃុំឃាំង និងបង្ខាំងមនុស្សដោយខុសច្បាប់ និងកាន់កាប់អាវុធដោយគ្មានការអនុញ្ញាត ដែលជាបទល្មើសព្រហ្មទណ្ឌ ហើយដែលករណីនេះ មិនជាប់ពាក់ព័ន្ធទៅនឹងការបង្ហាត់បង្រៀនគុនខ្មែររបស់បុគ្គលរូបនេះ ដូចការចុះផ្សាយរបស់បណ្តាញសារព័ត៌មាន និង Page Youtube មួយចំនួននោះទេ៕