មណ្ឌលគិរី៖ មនុស្សចំនួន៥នាក់ បានរងរបួសស្រាល នៅក្នុងករណីគ្រោះថ្នាក់ដែលបង្កឡើងដោយរថយន្តធុនធ្ងន់ដឹកស៊ីទែនហ្គាស បើកបរក្នុងល្បឿនលឿនចុះចំណោតជ្រុលចង្កូតបុករះតូបអ្នកលក់ដូរ កាលពីវេលាម៉ោង ២២និង១៥នាទី ថ្ងៃទី០៧ ខែសីហា ឆ្នាំ២០២២ នៅចំណុចផ្ទះតាលី ស្ថិតក្នុងភូមិចំបក់ សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី។

មន្ត្រីនគរបាលក្រុងសែនមនោរម្យ បានឲ្យដឹងថា រថយន្តបង្កប្រភេទ វេអង ពាក់ផ្លាកលេខ ៣E ភ្នំពេញ ៤១៩១ និងពុំទាន់ស្គាល់ឈ្មោះអ្នកបើកបរនៅឡើយទេ ចំណែកអ្នកពលរដ្ឋមានចំនួន៥នាក់ រងរបួសស្រាល។

ជុំវិញករណីនេះ អធិការនគរបាលក្រុងសែនមនោរម្យ លោក កាន់ ពេញ បានឲ្យដឹងថា គិតត្រឹមវេលាម៉ោង១០ព្រឹកថ្ងៃទី៨ ខែសីហា ឆ្នាំ២០២២ សមត្ថកិច្ចនៅមិនទាន់អាចបញ្ចប់កំណត់ហេតុនៅឡើយទេ ដោយសារស្ថានភាពនៃគ្រោះថ្នាក់ អាចឈានដល់ហានិភ័យខ្ពស់ ព្រោះស៊ីទែនមានផ្ទុកហ្គាសពេញ។

ទោះជាយ៉ាងណាស្នងការនគរបាល បានបញ្ជាឲ្យរថយន្តពន្លត់អគ្គិភ័យរង់ចាំអន្តរាគមន៍នៅទីតាំងកើតហេតុផ្ទាល់ បង្ការក្រែងកើតមានគ្រោះថ្នាក់ជាយថាហេតុ៕

អត្ថបទ៖លាង ឡា