ភ្នំពេញ៖ ជនសង្ស័យម្នាក់ ត្រូវបានសមត្ថកិច្ចនគរបាល ឃាត់ខ្លួននៅចំណុចផ្ទះសំណាក់ទឹកមាស ស្ថិតក្នុងសង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ កាលពីរសៀលថ្ងៃទី៦ ខែសីហា ឆ្នាំ២០២២ ក្រោយពីបានធ្វើសកម្មភាពបាញ់សម្លាប់ប្អូនប្រុសបង្កើត ហើយរត់គេចខ្លួនចេញពីខេត្តក្រចេះ។ 

ជនដែលសមត្ថកិច្ចឃាត់ខ្លួនមានឈ្មោះ ស្រ៊ុន ខុម អាយុ៣០ឆ្នាំ។ ចំណែកជនរងគ្រោះដែលរងការបាញ់ប្រហាររហូតដល់ស្លាប់ មានឈ្មោះ ស្រ៊ុន សុខាវ ភេទប្រុស អាយុ២១ឆ្នាំ។

សូមបញ្ជាក់ថា ករណីបងប្រុសបាញ់សម្លាប់ប្អូនប្រុសបង្កើតនេះ បានកើតឡើងកាលពីវេលាម៉ោង៨ ថ្ងៃទី៥ ខែសីហា ឆ្នាំ២០២២  នៅចំណុចការ៉េប្រាំបួន ស្ថិតក្នុងភូមិគ្រញូងសែនជយ័ ឃុំគ្រញូងសែនជយ័ ស្រុកស្នួល ខេត្តក្រចេះ។

របាយការណ៍របស់សមត្ថកិច្ចបានឱ្យដឹងថា ជនដៃដល់បានប្រើប្រាស់កាំភ្លើងខ្លី បាញ់ទៅលើឈ្មោះស្រ៊ុន សុខាវ ដោយសារទំនាស់ពាក្យសំដីគ្នា ។

ក្នុងពេលឃាត់ខ្លួនសមត្ថកិច្ច បានដកហូតវត្ថុតាងជាប់នឹងខ្លួនរួមមាន៖ អាវុធខ្លីចំនួន០១ដើម ម៉ាក Glock 19 ពណ៌ខ្មៅ បង់ចំនួន០២ គ្រាប់១២គ្រាប់,គ្រឿងញៀន០៣កញ្ចប់ (០១កញ្ចប់ធំ និង ០២កញ្ចប់មធ្យម),ជញ្ផើងសម្រាប់ ថ្លឹងគ្រឿងញៀនចំនួន១៕