បន្ទាយមានជ័យ៖ អាជ្ញាធរខេត្តស្រះកែវ ប្រទេសថៃ បានយល់ព្រមឱ្យប្រជាពលរដ្ឋខ្មែរ ដែលប្រើប្រាស់ប័ណ្ណព្រំដែន កម្ពុជា-ថៃ (Cambodia-Thailand Border Pass) មានសុពលភាពប្រើប្រាស់រយៈពេល ៧ថ្ងៃ ដោយចាប់ផ្តើមអនុវត្តពីថ្ងៃទី៤ ខែសីហា ឆ្នាំ២០២២នេះ។

យោងតាមការប្រកាសរបស់រដ្ឋបាលខេត្តបន្ទាយមានជ័យ បានឱ្យដឹងថា ក្រោយពេលមានការសម្របសម្រួលរបស់ លោក អ៊ុ រាត្រី អភិបាលខេត្តបន្ទាយមានជ័យ ជាមួយអាជ្ញាធរខេត្តស្រះកែវ ប្រទេសថៃ រួចមកអាជ្ញាធរថៃ បានយល់ព្រមឱ្យប្រជាពលរដ្ឋខ្មែរ ដែលប្រើប្រាស់ប័ណ្ណព្រំដែនកម្ពុជា-ថៃ (Cambodia-Thailand Border Pass) មានសុពលភាពប្រើប្រាស់រយៈពេល ៧ថ្ងៃ ដោយចាប់ផ្តើមអនុវត្តពីថ្ងៃទី៤ ខែសីហា ឆ្នាំ២០២២នេះតទៅ។ 

សូមរំលឹកថា ច្រកទ្វារអន្តរជាតិ ប៉ោយប៉ែត-ខ្លងលឹក ត្រូវបានអាជ្ញាធរកម្ពុជា ថៃ បើកដំណើការជាប្រក្រតីឡើងវិញ កាលពីថ្ងៃទី១ ខែឧសភា ឆ្នាំ២០២២ ក្រោយពេលមានការរឹតបន្តឹងសកម្មភាពចេញចូល ដោយសារបញ្ហាជំងឺកូវីដ-១៩ ។

របាយការណ៍របស់អាជ្ញាធរកម្ពុជា ធ្លាប់បានឱ្យដឹងថា ក្រោយពេលបើកច្រករួចមក មានប្រជាពលរដ្ឋ ជាអាជីវករខ្មែរ បានធ្វើដំណើរចេញ-ចូល ក្នុងផ្សាររោងក្លឿ ស្រុកអារញ្ញប្រាថេត ខេត្តស្រះកែវ ជាបន្តបន្ទាប់ ខណៈពលរដ្ឋថៃ ក៏ចូលមកកម្ពុជា ជាហូរហែរដែរ ដែលធ្វើឱ្យតំបន់ច្រកអន្តរជាតិនេះ បានសកម្មភាពមមាញឹកជាងមុន៕

អត្ថបទ៖លាង ឡា