សៀមរាប៖ មនុស្សចំនួន៣នាក់ បានបាត់បង់ជីវិត និងចំនួន៥នាក់ទៀត បានរងរបួសធ្ងន់-ស្រាល ដោយសារគ្រោះថ្នាក់ចរាចរណ៍រវាងរថយន្តដឹកអ្នកដំណើរ បុកគ្នាជាមួយគោយន្តកន្ត្រៃ កាលពីល្ងាចថ្ងៃទី២ ខែសីហា ឆ្នាំ២០២២ នៅតាមបណ្តោយផ្លូវជាតិលេខ៦ ស្ថិតក្នុងភូមិគោកត្រុំ ឃុំស្រណាល ស្រុកក្រឡាញ់ ខេត្តសៀមរាប។

អធិការនគរបាលស្រុកក្រឡាញ់ លោកវរសេនីយ៍ឯក ជី បេងជន បានឲ្យដឹងនៅព្រឹកថ្ងៃទី៣ ខែសីហា នេះថា ករណីនេះ បង្កឡើងដោយរថយន្តម៉ាក Hyundai ពាក់ផ្លាកលេខ ភ្នំពេញ 3E. 1209 ក្នុងទិសដៅពីកើត ទៅលិច មានអ្នករួមដំណើរជាភ្ញៀវបរទេស ចំនួន៨នាក់ និងជនជាតិខ្មែរម្នាក់ ។ 

លុះមកដល់ចំណុចកើតហេតុ អ្នកបើកបររថយន្តក្រុង បានចូលមកចំណែកខាងឆ្វេងដៃ ក៏បានបុកគោយន្តកន្ត្រៃមួយគ្រឿង បើកបរដោយឈ្មោះ គឹម កាន ភេទប្រុស អាយុ៣៧ឆ្នាំ រស់នៅភូមិតាខែក ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ ដែលបើកបញ្ច្រាសទិសគ្នា បណ្តាលឲ្យអ្នកជិះគោយន្តកន្ត្រៃ៣នាក់ស្លាប់ និង៥នាក់ផ្សេងទៀតរងរបួសតែម្ដង។

សូមបញ្ជាក់ថា ក្រោយពេលកើតហេតុ កម្លាំងជំនាញបានចុះពិនិត្យ និងប្រមូលវត្ថុតាង យកទៅរក្សាទុក ដើម្បីចាត់ការបន្តតាមនីតិវិធីច្បាប់៕

អត្ថបទ៖លាង ឡា