ភ្នំពេញ៖ លោកឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការគ្រប់គ្រង និងអភិវឌ្ឍន៍ទេសចរណ៍ សៀមរាប-អង្គរ បានផ្តល់នូវអនុសាសន៍មួយចំនួន ដល់អ្នកពាក់ព័ន្ធ ដើម្បីឱ្យផែនការមេអភិវឌ្ឍន៍ទេសចរណ៍ មានដំណើរការល្អ។
ការផ្តល់អនុសាសន៍នេះ បានធ្វើឡើងនៅក្នុងពិធីប្រកាសផ្សព្វផ្សាយសមាសភាព និងយន្តការអនុវត្តចំណុះឱ្យគណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ អមជាមួយការប្រកាសផែនការសកម្មភាព នៃផែនការមេអភិវឌ្ឍន៍ទេសចរណ៍ ខេត្តសៀមរាប (ឆ្នាំ២០២២-២០២៣) តាមរយៈវីដេអូ អនឡាញ នាព្រឹកថ្ងៃទី១ ខែសីហា ឆ្នាំ២០២២នេះ។
លោកឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការគ្រប់គ្រង និងអភិវឌ្ឍន៍ទេសចរណ៍ សៀមរាប-អង្គរ បានផ្តល់អនុសាសន៍ជាក់លាក់មួយចំនួនរួមមាន៖- ក្រសួងស្ថាប័ន្ឋពាក់ព័ន្ធចំណុះឱ្យយន្តការនៃគណៈកម្មការគ្រប់គ្រង និងអភិវឌ្ឍន៍ទេសចរណ៍ សៀមរាប-អង្គរ ត្រូវចូលរួមអនុវត្តន៍ប្រកបដោយស្មារតីទទួលសុខត្រូវខ្ពស់, បន្តអភិវឌ្ឍន៍កំពុងផែចុងឃ្នាស ឱ្យស្របតាមស្តង់ដារ កំពុងផែទេសចរណ៍ ដោយត្រូវរៀបចំផែនការ សម្រាប់រយៈពេលខ្លី និងវែង,ក្រសួងទេសចរណ៍ ត្រូវសិក្សាកំណត់ទីតាំង និងអភិវឌ្ឍន៍ តំបន់ទេសចរណ៍ សៀមរាបថ្មី,គណៈប្រតិបត្តិ ត្រូវរៀបចំគម្រោងថវិកា ដើម្បីអនុវត្តន៍ការងារ ឆ្នាំ២០២២-២០២៣, គណៈកម្មការទាំង៥ ត្រូវរៀបចំកម្មវិធីការងាររបស់ខ្លួន ដោយសហការជាមួយដៃគូ,លេខាធិការដ្ធាន ត្រូវរៀបចំវគ្គបណ្ដុះបណ្ដាល អំពីផែនការមេ អភិវឌ្ឍន៍ទេសចរណ៍ ឆ្នាំ២០២១-២០៣៥ ដល់ភាគីពាក់ព័ន្ធ,អនុគណៈកម្មការផ្សព្វផ្សាយ និងទាក់ទាញទេសចរ ត្រូវសហការជាមួយភាគីពាក់ព័ន្ធ រៀបចំនូវយុទ្ធសាស្រ្ត ស្របតាមមាគ៌ាដែលបានកំណត់ និងបន្តពង្រឹងលក្ខណៈសម្បត្តិរបស់ខេត្តសៀមរាប ជាដើម៕
