ភ្នំពេញ៖ អគ្គនាយកដា្ឋនពន្ធនាគារ បានច្រានចោលចំពោះការផ្សាយរបស់បណ្តាញសារព័ត៌មានវិទ្យុអាស៊ីសេរី ស្តីពីករណីជនជាប់ឃុំ ឈ្មោះ ឡី សុខុន នៅពន្ធនាគារខេត្តបាត់ដំបង និងចាត់ទុកថា ជាការចុះផ្សាយគ្មានវិជ្ជាជីវៈ។

លោក នុត សវនា អ្នកនាំពាក្យ អគ្គនាយកដា្ឋនពន្ធនាគារ បានថ្លែងថា ក្រោយពីបានឃើញនិងស្តាប់ពីការអត្ថាធិប្បាយរបស់បណ្តាញសារព័ត៌មានវិទ្យុអាស៊ីសេរី RFA កាលពីថ្ងៃទី២៧ ខែកក្កដា ឆ្នាំ២០២២ ស្តីពីករណីជនជាប់ឃុំឈ្មោះ ឡី សុខុន នៅពន្ធនាគារខេត្តបាត់ដំបង អគ្គនាយកដា្ឋនពន្ធនាគារធ្វើការច្រានចោលទាំងស្រុងចំពោះការចុះផ្សាយគ្មានវិជ្ជាជីវៈមានចរិតញុះញង់ បំភ្លៃការពិត បង្កឲ្យមានការភ័ន្តច្រឡំ ធ្វើឲ្យប៉ះពាល់ដល់កិត្តិយស និងសេចក្តីថ្លៃថ្នូររបស់មន្ត្រីពន្ធនាគារខេត្តបាត់ដំបង តាមរយៈការផ្សព្វផ្សាយព័ត៌មានក្លែងក្លាយនៅតាមគេហទំព័រ និងវិទ្យុរបស់សារព័ត៌មានអាស៊ីសេរី RFA។

ជាមួយគ្នានេះ អ្នកនាំពាក្យ នៃអគ្គនាយកដ្ឋានពន្ធនាគារ បានបំភ្លឺថា ជនជាប់ឃុំឈ្មោះ ឡី សុខុន មានសុខភាពល្អធម្មតា និងមិនមានសភាពស្គមស្គាំងឡើយ ហើយមានកាយសម្បទាដូចដើម ចំណែកការចាប់កោរសក់ជាព័ត៌មានបំភ្លៃការពិតទាំងស្រុង ខណៈការពិតពេលចូលមកដល់ពន្ធនាគារ ជនជាប់ឃុំ ឡី សុខុន ជាអ្នកស្នើសុំកាត់សក់ឲ្យខ្លី ដើម្បីងាយស្រួលថែរក្សាអនាម័យ ក្នុងការរស់នៅដោយខ្លួនឯង។

លោក នុត សវនា បានលើកឡើងបន្តថា ចំពោះថ្នាំសង្កូវជាបញ្ញើរបស់ភរិយាជនជាប់ឃុំ សុខុន អនុលោមតាមនីតិវិធី និងបទបញ្ជាផ្ទៃក្នុង ពន្ធនាគារ តម្រូវឲ្យមន្ត្រីពន្ធនាគាររក្សាទុកសម្រាប់បើកជូនតាមវេជ្ជបញ្ជា ដោយមិនអនុញ្ញាតឲ្យជនជាប់ឃុំទុកជាប់ ខ្លួនទាំងអស់ទេ។ ពាក់ព័ន្ធនឹងអាការៈរមាស់ មន្ត្រីពេទ្យពន្ធនាគារខេត្តបាត់ដំបង បានពិនិត្យដងខ្លួនរបស់ជនជាប់ឃុំ ឡី សុខុន នៅរសៀលថ្ងៃទី២៩ ខែកក្កដា ឆ្នាំ២០២២ នេះ ពុំមានបញ្ហាដូចការផ្សាយនោះដែរ។

អ្នកនាំពាក្យ នៃអគ្គនាយកដា្ឋនពន្ធនាគារ បានក្រើនរំលឹកដល់សារព័ត៌មានវិទ្យុអាស៊ីសេរី ពីការប្រកាន់ខ្ជាប់នូវ វិជ្ជាជីវៈសារព័ត៌មាន និងជៀសវាងការផលិតព័ត៌មានក្លែងក្លាយ (fake news) ដែលអាចបំពុលបរិយាកាស បង្កការ បែកបាក់ក្នុងសង្គម (social” division) និងការមើលងាយប្រព័ន្ធយុត្តិធម៌ព្រហ្មទណ្ឌនៅកម្ពុជា៕

អត្ថបទ៖លាង ឡា