នៅថ្ងៃទី៣០ ខែកក្កដា ឆ្នាំ២០២២ខាងមុខ នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រីនិងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ, លោកជំទាវឧកញ៉ា អគ្គមហាឧបាសិកាពុទ្ធសាសនូបត្ថម្ភក៏ ម៉ៅ ម៉ាល័យ, លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈព្រមទាំងសហការី នឹងរៀបចំកម្មវិធីបុណ្យមួយ ដើម្បីដង្ហែផ្ទាំងចម្លាក់រូបព្រះលោកេស្វរៈ ពីសារមន្ទីរជាតិភ្នំពេញឆ្ពោះទៅកាន់ប្រាសាទបន្ទាយឆ្មារ ស្រុកថ្មពួក ខេត្តបន្ទាយមានជ័យ នេះបើយោងតាមកម្មវិធីបុណ្យដែលទទួលបាន។
លោក ឡុង ប៉ុណ្ណាស៊ីរីវត្ថ អ្នកនាំពាក្យក្រសួងវប្បធម៌ និងវិចិត្រសិល្បៈបានមានប្រសាសន៏ថា ផ្ទាំងរូបដែលត្រូវដង្ហែរទៅកាន់ប្រាសាទបន្ទាយឆ្មារនេះគឺជាផ្ទាំងរូបដែលទទួលបានពីកិច្ចសហប្រតិបត្តិការរវាងកម្ពុជា និងថៃពីព្រោះរូបនេះត្រូវបានលួចចេញទៅក្រៅប្រទេសហើយតាមកិច្ចសហប្រតិបត្តិការនៅឆ្នាំ២០០០ ថៃបានផ្ដល់មកឲ្យកម្ពុជាវិញ ដែលមានចំនួន៩៩ដុំ ហើយផ្គុំឡើងបានជារូបព្រះលោកេស្វរៈនេះតម្កល់ទុកនៅសារមន្ទីរជាតិផ្នែកសាលពិព័រណ៍។
លោក ឡុង ប៉ុណ្ណាស៊ីរីវត្ថ បានបញ្ជាក់ថា ដោយសារមានការជួសជុលថែទាំប្រាសាទបន្ទាយឆ្មារ ហើយនៅពេលធ្វើការជួសជុលនោះក៏បាត់ផ្ទាំងរូបមួយចំណែក (ដែលជាចំណែកកំពុងតែរក្សាទុកនៅសារមន្ទីរជាតិ និងហែទៅថ្ងៃទី៣០ខាងមុខ) ដូច្នេះលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ក៏សម្រេចឱ្យយកផ្ទាំងសិលា ដែលតម្កល់ទុកនៅសារមន្ទីរជាតិនេះយកទៅដាក់នៅកន្លែងដើមវិញ។ លោកថា នៅពេលដែលភាគីខាងថៃប្រគល់មកឲ្យកម្ពុជាវិញនោះ កម្ពុជាយើងមិនបានយកទៅតម្កល់នៅប្រាសាទបន្ទាយឆ្មាវិញនោះទេដោយសារតែបញ្ហាសុវត្ថិភាព អសន្តិសុខ ដូច្នេះការដង្ហែរត្រឡប់ទៅវិញនាពេលនេះ គឺជាការបង្ហាញពីសុខសន្តិភាព ស្ថិរភាពសង្គម ដែលយើងត្រូវនាំយកផ្ទាំងរូបនេះទៅតម្កល់នៅកន្លែងដើមវិញ។
បើតាមមន្ត្រីអ្នកនាំពាក្យក្រសួងវប្បធម៌រូបនោះបញ្ជាក់ដែរថា ការដង្ហែរផ្ទាំងរូបព្រះលោកេស្វរៈនេះទៅដាក់កន្លែងដើមវិញ គឺហាក់ដូចជាភ្ជាប់ព្រលឹងឡើងវិញ។ មានន័យថា អ្វីដែលបាត់បង់យើងឲ្យវិលទៅកន្លែងដើមវិញគឺដូចជាបាត់ព្រលឹងបាត់ដងខ្លួនយើងភ្ជាប់គ្នាឡើងវិញ ដែលនេះគឺជាទិដ្ឋភាពសង្គមហើយជាការខិតខំប្រឹងប្រែងរបស់រាជរដ្ឋាភិបាល។
សូមបញ្ជាក់ថា ផ្ទាំងរូបចម្លាក់នោះផ្គុំឡើងដោយសិលាចំនួន៩៩ដុំ មានប្រវែង៥,៥៣ ម៉ែត្រ កម្ពស់២,៨៣ ម៉ែត្រ។
បើតាមកម្មវិធី នៅថ្ងៃសុក្រ ទី២៩ ខែកក្កដា ឆ្នាំ២០២២ ម៉ោង៧ និង៣០ នាទីដល់ ម៉ោង៨ ព្រឹក ពិធីក្រុងពាលី និងបួងសួងនៅបរិវេណផ្ទាំងចម្លាក់រូបព្រះលោកេស្វរៈ ក្នុងសារមន្ទីរជាតិ។ ម៉ោង ២និង៣០នាទីរសៀល និមន្តព្រះសង្ឃសមាទានសីលនិងចំរើនព្រះបរិត្តនៅរោងបុណ្យមុខសារមនី្ទរជាតិ។ ម៉ោង៣និង៣០ នាទីរសៀល សម្ដែងធម្មទេសនាគ្រែពីរ ដោយសម្តេចព្រះឧត្តមចរិយាបណ្ឌិត លីង ប៊ុនឈា អនុប្រធានថេរសភានៃព្រះពុទ្ធសាសនា នៃព្រះរាជាណាចក្រកម្ពុជា និងសម្តេចព្រះពុទ្ធជ័យមុនី ឃឹម សន ព្រះមេគណរាជធានីភ្នំពេញ។ ម៉ោង៥រសៀល ពិសាអាហារសាមគ្គី (មន្ត្រីសារមន្ទីរជាតិនិងភ្ញៀវកិត្តិយស)។
នៅថ្ងៃសៅរ៍ទី៣០ ខែកក្កដា ឆ្នាំ២០២២ ម៉ោង៣ ទៀបភ្លឺ ដង្ហែរផ្ទាំងចម្លាក់រូបព្រះលោកេស្វរៈឆ្ពោះ ទៅកាន់ប្រាសាទបន្ទាយឆ្មារ ឃុំបន្ទាយ ឆ្មារ ស្រុកថ្មពួក ខេត្តបន្ទាយមានជ័យ៕
