ភ្នំពេញ៖ ប្រធានអាស៊ាន បានសម្តែងការខកចិត្តចំពោះការប្រហារជីវិតសកម្មជនបក្សប្រឆាំង ចំនួន ៤រូប នៅប្រទេសមីយ៉ាន់ម៉ា ទោះបីមានការស្នើសុំឱ្យពិចារណាឡើងវិញលើសេចក្តីសម្រេចផ្តន្ទាទោសលើជនទាំងនោះពីសំណាក់ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងនាមជាប្រធានអាស៊ាន ក៏ដូចជារដ្ឋសមាជិកអាស៊ានដទៃទៀតយ៉ាងណាក្ដី។

នៅក្នុងសេចក្តីថ្លែងការណ៍មួយរបស់ប្រធានអាស៊ានបានឱ្យដឹងថា ការប្រហារជីវិតសកម្មជនបក្សប្រឆាំង ចំនួន ៤រូប ដែលក្នុងនោះរួមមានលោក ក្យូ ហ្សេយ៉ាថរ លោក ក្បូរមីនយូ លោក ឡា មីយូអោង និងលោក អោង ធូរ៉ាហ្ស ជាបញ្ហាដែលអាស៊ានយកចិត្តទុកដាក់យ៉ាងខ្លាំង។

សេចក្តីថ្លែងការណ៍បានឱ្យដឹងបន្តថា ខណៈដែលមានការទទួលស្គាល់នូវភាពស្មុគស្មាញនៃវិបត្តិ ព្រមទាំងកំដៅទោសៈមោហៈផ្ទុះឡើង គ្រប់ទិសទីក្នុងប្រទេសមីយ៉ាន់ម៉ា អាស៊ានជារួមបានអំពាវនាវឱ្យភាគីពាក់ព័ន្ធទាំងអស់មានការអត់ទ្រាំ និងភាពអត់ធ្មត់ជាអតិបរិមាហើយខិតខំជៀសវាងមិនធ្វើឲ្យជម្លោះរីករាលដាលកាន់តែខ្លាំង ។

សេចក្តីថ្លែងការណ៍បានចាត់ទុកការអនុវត្តទោសប្រហារជីវិត តែមួយសប្ដាហ៍មុនកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ បានទាញថយក្រោយនូវវឌ្ឍនភាព និងថែមទាំង សបញ្ជាក់ច្បាស់ពីកង្វះឆន្ទៈគាំទ្រកិច្ចខិតខំប្រឹងប្រែង ជាពិសេសរបស់ប្រធានអាស៊ាន ក្នុងការជួយពន្លឿនវឌ្ឍនភាពនៃការអនុវត្តកិច្ចព្រមព្រៀងជាឯកច្ឆន្ទ៥ចំណុច។

ប្រធានអាស៊ានបានជំរុញឱ្យអាជ្ញាធរទីក្រុងណៃពិដោ ចាត់វិធានការ ជាក់ស្ដែង ដើម្បីអនុវត្តកិច្ចព្រមព្រៀងជាឯកច្ឆន្ទ៥ចំណុចឱ្យបានពេញលេញ និងប្រកបដោយ ប្រសិទ្ធភាព និងបានអំពាវនាវយ៉ាងខ្លាំងក្លា និងជាបន្ទាន់ដល់ភាគីទាំងអស់ឱ្យជៀសវាងនូវសកម្មភាពទាំងឡាយណាដែលធ្វើឱ្យវិបត្តិនៅមីយ៉ាន់ម៉ាកាន់តែធ្លាក់ដុនដាប រារាំងដល់ការសន្ទនាដោយសន្តិវិធីក្នុងចំណោមភាគីពាក់ព័ន្ធទាំងអស់ និងបង្កគ្រោះថ្នាក់ដល់សន្តិភាព សន្តិសុខ និង ស្ថិរភាពទាំងនៅមីយានម៉ា និងក្នុងតំបន់ទាំងមូល៕