ភ្នំពេញ៖ ក្រសួងមហាផ្ទៃ បានស្នើទៅរាជរដ្ឋាភិបាល ដើម្បីរៀបចំច្បាប់គ្រប់គ្រងសារធាតុផ្សំនានា ក្រោយពិនិត្យឃើញថា ឧក្រឹដ្ឋជនបាននាំចូលសារធាតុមួយចំនួនមកផលិតជាគ្រឿងញៀនក្នុងលក្ខណៈទ្រង់ទ្រាយធំ។
សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការអគារសិក្សា សាលាបឋមសិក្សាមួយនៅភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល កាលពីថ្ងៃទី២៣ ខែកក្កដា ឆ្នាំ២០២២ថា សម្តេចបានស្នើទៅប្រមុខរដ្ឋាភិបាល ដើម្បីធ្វើច្បាប់ស្តីពីការគ្រប់គ្រងសារធាតុផ្សំ ខណៈសារធាតុផ្សំមួយចំនួនត្រូវបានគេនាំចូលដើម្បីផ្សំជាគ្រឿងញៀន ដែលបង្កជាបញ្ហា។
សម្តេចក្រឡាហោម ស ខេង បានមានប្រសាសន៍លើកឡើងថា ការធ្វើច្បាប់ស្តីពីការគ្រប់គ្រងសារធាតុផ្សំ គឺមានគ្រប់គ្រងតាំងពីការផ្តល់អាជ្ញាប័ណ្ណនាំចូល នឹងជាផ្នែកមួយឈានដល់ការប្រយុទ្ឋប្រឆាំងនឹងការសម្អាតប្រាក់ទៀតផង។
កាលពីពេលថ្មីៗនេះ អាជ្ញាធរកម្ពុជា បានឃាត់ខ្លួនជនជាតិចិន ចំនួន១១នាក់ នៅក្នុងករណី បង្ក្រាបករណីកែច្នៃផលិតគ្រឿងញៀន នៅក្នុងភូមិសាស្រ្តរាជធានីភ្នំពេញ ខេត្តស្វាយរៀង ព្រៃវែង និងខេត្កណ្តាល ព្រមទាំងរឹបអូសបានសារធាតុញៀនទម្ងន់ជាង ១៨០០គីឡូ និងដកហូតសារធាតុគីមី ទម្ងន់ជាង ២៧៦តោន៕
