បន្ទាយមានជ័យ៖ បុរសជនបរទេសម្នាក់ត្រូវបានអាជ្ញាធរថៃ តាមរកនិងសុំកិច្ចសហការពីអាជ្ញាធរកម្ពុជា ក្រោយពេលជនបរទេសរូបនោះព្យាយាមគេចវេសបន្ទាប់ពីរកឃើញថាបានកើតជំងឺអ៊ុតស្វា។

អភិបាលខេត្តបន្ទាយមានជ័យ លោក អ៊ុ រាត្រី បានឲ្យដឹងនៅព្រឹកថ្ងៃទី២៣ ខែកក្កដា នេះថាបន្ទាប់ពីទទួលបានព័ត៌មានអំពីការរត់គេចខ្លួនរបស់បុរសម្នាក់ ជនជាតិនីហ្សេរីយ៉ា មានជំងឺអ៊ុតស្វាដំបូងគេនៅប្រទេសថៃ ភ្លាមៗអាជ្ញាធរខេត្តស្រះកែវ ប្រទេសថៃ បានស្នើសុំកិច្ចសហការពីអាជ្ញាធរខេត្តបន្ទាយមានជ័យដើម្បីស្វែងរកផងដែរ។

អភិបាលខេត្តបន្ទាយមានជ័យបានបញ្ជាឱ្យអាជ្ញាធរ និងសមត្ថកិច្ចតាមព្រំដែនទាំងអស់បន្តការតាមដានទៅលើអត្តសញ្ញាណជនបរទេស ដែលកើតជំងឺអ៊ុតស្វាដែលអាជ្ញាធរថៃប្រកាសតាមរក។

សូមរំលឹកថា ក្រសួងសុខាភិបាល ធ្លាប់បានបញ្ជាក់ថា កម្ពុជា ពុំទាន់កើតមានករណីជំងឺអ៊ុតស្វាណាមួយនៅឡើយទេ ប៉ុន្តែបានអំពាវនាវដល់ប្រជាពលរដ្ឋឱ្យមានការប្រុងប្រយ័ត្ន និងជៀសវាងការប៉ះពាល់ជាមួយសត្វដែលមានជំងឺដែលអាចមានផ្ទុកនៅវីរុសអុតស្វា (Morkeypox) ហើយគួរចៀសវាងការបរិភោគសាច់សត្វព្រៃ៕

អត្ថបទ៖លាង ឡា