ភ្នំពេញ៖ ក្រសួងពាណិជ្ជកម្ម បានជូនដំណឹងថា តម្លៃប្រេងឥន្ធនៈ នឹងចុះមកនៅត្រឹម៤៨០០រៀលក្នុង១លីត្រ សម្រាប់សាំងធម្មតា និង៥៣០០រៀលក្នុង១លីត្រ សម្រាប់ប្រេងម៉ាស៊ូត។

សេចក្តីជូនដំណឹងរបស់ក្រសួងពាណិជ្ជកម្ម បានឱ្យដឹងនៅព្រឹកថ្ងៃទី២១ ខែកក្កដានេះថា តម្លៃលក់រាយប្រេងឥន្ធនៈនេះ នឹងចាប់អនុវត្តពីថ្ងៃទី២១ ដល់ថ្ងៃទី៣១ ខែកក្កដា ឆ្នាំ២០២២។

សូមបញ្ចាក់ថា នាពេលថ្មីៗនេះ តម្លៃប្រេងឥន្ធនៈបានឡើងថ្លៃជាបន្តបន្ទាប់ ក្រោយពេលកើតមានសង្រ្គាមរវាងប្រទេសរុស្ស៊ី និងប្រទេសអ៊ុយក្រែន។

សម្ដេច តេជោ ហ៊ុន សែន នាយករដ្ឋមន្រ្តីកម្ពុជា ធ្លាប់បានមានប្រសាសន៍សុំការយោគយល់ពីសំណាក់ប្រជាពលរដ្ឋខ្មែរជុំវិញរឿងប្រេងឥន្ធនៈឡើងថ្លៃ ព្រោះវាជាបញ្ហាដែលកើតឡើងលើពិភពលោក ដោយសារតែសង្គ្រាមរវាងរុស្ស៊ី និងអ៊ុយក្រែន ។

ក្រសួងពាណិជ្ជកម្ម បានឱ្យដឹងនាពេលកន្លងទៅថា បច្ចុប្បន្នប្រេងឥន្ធនៈដែលកម្ពុជាប្រើប្រាស់ ត្រូវបាននាំចូលពីប្រទេសសិង្ហបុរី ថៃ និងវៀតណាម ៕

អត្ថបទ៖លាង ឡា