ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជី លើគម្រោងវិនិយោគចំនួន៤ ដែលមានទំហំទឹកប្រាក់ជិត១០០លានដុល្លារអាម៉េរិក ខណៈគម្រោងវិនិយោគទាំងនេះ អាចបង្កើតការងារ បានជាង២០០០កន្លែង។

តាមការឱ្យដឹងពីក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា គម្រោងដែលបានសម្រេចចុះបញ្ជីទាំង៤ រួមមាន៖

១- “L-Q New Energy CO., LTD.” គម្រោងបង្កើតរោងចក្រផលិតបន្ទះសូឡា ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស យូ ប៊ី អ៊ី ស្នួល ខេត្តក្រចេះ មានទុនវិនិយោគចំនួន ៨៤,៥ លានដុល្លារអាម៉េរិក និងបង្កើតការងារបានចំនួនប្រមាណ ១.០០០នាក់។

២- “Eastcam Casting Co., Ltd.” គម្រោងបង្កើតរោងចក្រផលិត និងកែច្នៃបំពង់ទីបដែក និងកែច្នៃដំណរបំពង់ទីបដែកគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស សានដុង សាន់សែល ស្វាយរៀង ខេត្តស្វាយរៀង មានទុនវិនិយោគចំនួន ៥,៨ លានដុល្លារអាម៉េរិក និងបង្កើតការងារបានចំនួនប្រមាណ ២០០នាក់។

៣- “MEGA HARDWOOD CO., LTD” គម្រោងបង្កើតរោងចក្រផលិតក្តាប៉ាកេ និងក្តារបន្ទះ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ ខេត្តព្រះសីហនុ មានទុនវិនិយោគចំនួន ៥លានដុល្លារអាម៉េរិក និងបង្កើតការងារបានចំនួនប្រមាណ ៣០០នាក់។

និងទី៤- “XIN JIN WEI GARMENT (CAMBODIA) CO., LTD” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ ខេត្តព្រះសីហនុ មានទុនវិនិយោគចំនួន ១,៥លានដុល្លារអាម៉េរិក និងបង្កើតការងារបានចំនួនប្រមាណ ៥៥០នាក់។

គួរកត់សម្គាល់ថា គម្រោងវិនិយោគជាច្រើន បានចាប់ផ្តើមចូលមកកម្ពុជា ក្រោយពេលដែលរាជរដ្ឋាភិបាល បានសម្រួល និងលើកលែងលើកិច្ចការសំខាន់ៗមួយចំនួនពាក់ព័ន្ឋនឹងការចេញចូលប្រទេស ក្នុងគ្រាដែលពិភពលោក រួមទាំងកម្ពុជាផង កំពុងប្រឈមនឹងជំងឺកូវីដ-១៩៕

អត្ថបទ៖លាង ឡា