ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជី លើគម្រោងវិនិយោគចំនួន២ ដែលមានទំហំទឹកប្រាក់ជាង៦លានដុល្លារអាម៉េរិក ខណៈគម្រោងវិនិយោគទាំងនេះ អាចបង្កើតការងារ បានជាង២០០០កន្លែង។

តាមការឱ្យដឹងពីក្រុមប្រឹក្សាអភិវឌ្ឍន៍កម្ពុជា បានបញ្ជាក់នៅរសៀលថ្ងៃទី១៤ ខែកក្កដា ឆ្នាំ២០២២នេះថា គម្រោងដែលបានសម្រេចចុះបញ្ជីទាំង២ រួមមាន៖

១. XIN MEI DA (CAMBODIA) GARMENT CO., LTD គម្រោងបង្កើតរោងចក្រកាត់ដេរសម្លៀកបំពាក់ដែលមានទីតាំងវិនិយោគស្ថិតនៅអគារ B ផ្លូវចោមចៅ ស្ថិតក្នុងភូមិដំណាក់ធំ២ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ក្នុងទុនវិនិយោគប្រមាណ ៣,៦លានដុល្លារអាម៉េរិក នឹងអាចបង្កើតការងារបានចំនួន ៩៩៧កន្លែង។

២. W.L WEI LIAN GARMENT CO., LTD គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិត្រាច ឃុំកាហែង ស្រុកសំរោងទង ខេត្តកំពង់ស្ពឺ ក្នុងទុនវិនិយោគប្រមាណ ៣,១លានដុល្លារអាម៉េរិក នឹងអាចបង្កើតការងារបានចំនួន ១.២២០កន្លែង។

គួរកត់សម្គាល់ថា គំរោងវិនិយោគជាច្រើន បានចាប់ផ្តើមចូលមកកម្ពុជា ក្រោយពេលដែលរាជរដ្ឋាភិបាល បានសម្រួល និងលើកលែងលើកិច្ចការសំខាន់ៗមួយចំនួនពាក់ព័ន្ឋនឹងការចេញចូលប្រទេស ក្នុងគ្រាដែលពិភពលោក រួមទាំងកម្ពុជាផង កំពុងប្រឈមនឹងជំងឺកូវីដ-១៩៕