ភ្នំពេញ៖ អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានស្នើរដល់ស្ថាប័នពាក់ព័ន្ឋឱ្យពិនិត្យមើលស្ថានភាពតំបន់ដែលកើតមានករណីរន្ទះបាញ់ញឹកញាប់ ដើម្បីរកវិធីដាក់អង់តែនការពារ និងកាត់បន្ថយគ្រោះថ្នាក់អាយុជីវិត។
លោកទេសរដ្ឋរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍ក្នុងវេទិកាជាតិ ស្តីពី ការកាត់បន្ថយហានិភ័យគ្រោះមហន្តរាយលើកទី២៩ នាព្រឹកថ្ងៃទី១៣ ខែកក្កដា ឆ្នាំ២០២២នេះថា ស្ថិតិអ្នកស្លាប់ដោយសារករណីរន្ទះបាញ់ក្នុងរយៈពេលប៉ុន្មានឆ្នាំមកនេះបានកើតមានច្រើន។ លោកទេសរដ្ឋរដ្ឋមន្ត្រី បានណែនាំដល់មន្រ្តី និងដៃគូរពាក់ព័ន្ឋទាំងអស់ ត្រូវឱ្យចាប់អារម្មណ៍អំពីបញ្ហានេះ ដើម្បីសំណូមពរដល់ស្ថាប័នពាក់នានា លើកបង្គោលអង់តែនការពាររន្ទះ និងការពារអាយុជីវិត។
លោកទេសរដ្ឋរដ្ឋមន្ត្រី គន់ គីម បានលើកឡើងថា ការលើកបង្គោលអង់តែនការពាររន្ទះ ត្រូវបានអាជ្ញាធរខេត្តសៀមរាប ធ្វើរួចមកហើយ នៅក្នុងតំបន់ដែលកើតមានរន្ទះញឹកញាប់ ហើយក៏បានកាត់បន្ថយគ្រោះថ្នាក់បានមួយកម្រិតដែរ។ លោកបានបញ្ជាក់ឱ្យដឹងដែរថា ក្នុងឆ្នាំ២០២២នេះ គណៈកម្មាធិការជាតិគ្រប់គ្រងគ្រោះមហន្តរាយ គ្រោងស្នើរសុំទៅក្រសួងសេដ្ឋកិច្ច និងហិរញ្ញវត្ថុ ដើម្បីពិនិត្យលទ្ឋភាពដោះស្រាយ លើកបង្គោលអង់តែនការពាររន្ទះ ការពារអាយុជីវិតប្រជាពលរដ្ឋ។
សូមបញ្ជាក់ថា កាលពីពីពេលថ្មីៗនេះ គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា រយៈពេល៦ខែ ដើមឆ្នាំ២០២២ មានករណីរន្ទះបាញ់បានកើតឡើងចំនួន ៦១លើក បណ្តាលឱ្យស្លាប់មនុស្ស៣២នាក់ និង២៦នាក់ផ្សេងទៀត បានរងរបួស ព្រមទាំងសម្លាប់សត្វគោ ក្របីចំនួន ៦៩ក្បាល និងធ្វើខូចខាតផ្ទះសម្បែង ចំនួន ១១ខ្នង ផងដែរ៕
