ភ្នំពេញ៖ សត្វជ្រូករស់ចំនួន ២៣ក្បាល ត្រូវបានសមត្ថកិច្ចជំនាញរបស់អគ្គនាយកដ្ឋានសុខភាពសត្វនិងផលិតកម្មសត្វធ្វើការដុតកម្ទេចចោល ក្រោយពេលសត្វជ្រូកទាំងអស់ត្រូវបានឈ្មួញលួចនាំចូលខុសច្បាប់តាមច្រករបៀងហើយត្រូវបានរកឃើញថា មានផ្ទុកមេរោគនៃជំងឺឆ្លង។
យោងតាមសមាគមអ្នកចិញ្ចឹមសត្វកម្ពុជាបានឱ្យដឹងថា សកម្មភាពដុតកម្ទេចសត្វជ្រូកផ្ទុកជំងឺឆ្លងនេះបានធ្វើឡើងកាលពីព្រឹកថ្ងៃទី០៦ ខែកក្កដា ឆ្នាំ២០២២ នៅភូមិឱភាសាំង ឃុំកណ្ដឹង ស្រុកបាទី ខេត្តតាកែវ។
ប្រភពបានឱ្យបន្តថា ការដុតកម្ទេចនេះ មានការសម្របសម្រួលនីតិវិធីពីព្រះរាជអាជ្ញានៃអយ្យការអមសាលាដំបូងរាជធានីភ្នំពេញ និងដឹកនាំដោយលោក តាន់ ផាន់ណារ៉ា ប្រតិភូរាជ រដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វនិងផលិតកម្មសត្វ។
មន្រ្តីអគ្គនាយកដ្ឋានសុខភាពសត្វនិងផលិតកម្មសត្វបានបញ្ជាក់ឱ្យដឹងថា ជ្រូកដែលបានដុតកម្ទេចទាំងអស់ត្រូវបានឈ្មួញបាននាំចូលពីប្រទេសវៀតណាមមកកាន់ប្រទេសកម្ពុជា តាមច្រកស្វាយអាង៉ោង ស្រុកកំពង់ត្របែក ខេត្តព្រៃវែង បម្រុងនឹងយកទៅចែកចាយនៅរាជធានីភ្នំពេញ ដោយគ្មានលិខិតអនុញ្ញាតពីក្រសួងកសិកម្ម រុក្ខាប្រមាញ់និងនេសាទ ប៉ុន្តែត្រូវបានក្រុមអន្តរាគមន៍បង្ក្រាបបទល្មើសចរាចរសត្វនិងផលិតផលមានដើមកំណើតពីសត្វ នៃអគ្គនាយកដ្ឋានសុខភាពសត្វនិងផលិតកម្មសត្វ ឃាត់ចាប់បានកាលពីថ្ងៃទី១២ ខែមិថុនា ឆ្នាំ២០២២៕
