សៀមរាប៖ គម្រោងស្ថាបនាធ្វើឱ្យប្រសើឡើងនូវស្ថានីយ៍ប្រព្រឹត្តិកម្ម ទឹកកខ្វក់ (MPWT-CW4) ស្ថិតក្នុងក្រុងសៀមរាប ខេត្តសៀមរាប ត្រូវបានក្រុមមន្រ្តីចុះត្រួតពិនិត្យ ខណៈអ្នកជំនាញខាងសាងសង់កំពុងអនុវត្តការងារ ដើម្បីសម្រេចតាមផែនការនាពេលខាងមុខ។

កាលពីថ្ងៃព្រហស្បតិ៍ទី៣០ ខែមិថុនា ឆ្នាំ ២០២២ ក្រុមមន្រ្តី នៃអគ្គនាយកដ្ឋានប្រព័ន្ធចម្រោះទឹកកខ្វក់បានចុះត្រួតពិនិត្យការអនុវត្តគម្រោងនេះ ដើម្បីតាមដានវាយតម្លៃលើវឌ្ឍនភាពការងាររបស់ក្រុមហ៊ុន ដែលកំពុងសាងសង់ និងដើម្បីធានាដល់ការសម្រេចបាននូវប្រសិទ្ធភាពការងារ ប្រកបដោយទំនួលខុសត្រូវ សមស្របទៅតាមកិច្ចសន្យា។

យោងតាមការចេញផ្សាយរបស់ក្រសួងសាធារណការ និងដឹកជញ្ជូន បានឱ្យដឹងថា គិតត្រឹមចុងខែមិថុនា ឆ្នាំ២០២២ គម្រោងស្ថាបនាធ្វើឱ្យប្រសើឡើងស្ថានីយ៍ប្រព្រឹត្តិកម្ម ទឹកកខ្វក់(MPWT-CW4) នៅក្នុងក្រុងសៀមរាប សម្រេចបានជាង២៣ភាគរយហើយ ដោយទទួលបានការសាទរពីប្រជាពលរដ្ឋ និងអាជ្ញាធរមូលដ្ឋាន។ 

របាយការណ៍ដដែលបានឱ្យផងដែរថា ក្រុមការងារបច្ចេកទេស បានចុះពិនិត្យស្ថានភាពទីតាំងស្ថានីយ៍បូមថ្មីចំនួន០២កន្លែង ដោយផ្តោតលើលក្ខណៈបច្ចេកទេស ដើម្បីឈានដល់ការសិក្សាលម្អិតលើផ្នែកផ្សេងៗផងដែរ៕

អត្ថបទ៖លាង ឡា