ភ្នំពេញ៖ ចំណូលពន្ធដារ និងគយ បានឡើងដល់ជិត ៥០០លានដុល្លារ ក្នុងខែមិថុនា ឆ្នាំ២០២២ ខណៈកំណើនតម្រូវការក្នុងស្រុក និងកំណើនតម្រូវការនាំចូលមានការកើនឡើង។
មានប្រសាសន៍នៅក្នុងពិធីអបអរសាទរទិវាមច្ឆជាតិ ០១ កក្កដា នៅខេត្តបន្ទាយមានជ័យ នាព្រឹកថ្ងៃសុក្រ ទី០១ ខែកក្កដា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្រ្តីកម្ពុជាបានថ្លែងថា ចំណូលជិត ៥០០លានដុល្លារ ក្នុងខែមិថុនា ឆ្នាំ២០២២ នៅតែទាប បើធៀបនឹងកម្ពុជា ឆ្លងជំងឺកូវីដ-១៩។
សម្តេចនាយករដ្ឋមន្រ្តីកម្ពុជា មានប្រសាសន៍លើកឡើងថា នៅមុនពេលមានកូវីដ-១៩ កម្ពុជា ទទួលបានចំណូលចន្លោះពី៥០០-ទៅ៧០០លានដុល្លារអាមេរិក ក្នុង១ខែ។
សូមរំលឹកថា កាលពីឆ្នាំ២០២១កន្លងទៅ អគ្គនាយកដ្ឋានគយ និងរដ្ឋាករកម្ពុជា ប្រមូលចំណូលបានចំនួន ២ ២៩៤លានដុល្លារ ដែលស្មើនឹង៩៧,១ភាគរយនៃផែនការ ខណៈអគ្គនាយកដ្ឋានពន្ធដារ ប្រមូលចំណូលពន្ធបាន ២៧៨១,៩២លើសផែនការ ២៤,០២ភាគរយ នៃច្បាប់គ្រប់គ្រងហិរញ្ញប្រចាំឆ្នាំរបស់ក្រសួងសេដ្ឋកិច្ច និងហិរញ្ញវត្ថុ ក្នុងចំនួន ២ ២៤៣លានដុល្លារ៕
