ភ្នំពេញ ៖ សមត្ថកិច្ច នៃអគ្គស្នងការដ្ឋាននគរបាលជាតិ ទើបស្រាវជ្រាវចាប់ខ្លួនបុគ្គលម្នាក់ រស់នៅក្នុងខេត្តត្បូងឃ្មុំ តាមបញ្ជារបស់នាយករដ្ឋមន្រ្តីកម្ពុជា ក្រោយពេលបុគ្គលរូបនោះ បានធ្វើការផ្សព្វផ្សាយរូបភាពមិនពិតតាមបណ្តាញសង្គម ស្តីពីករណីមានមនុស្សឆ្លង និងស្លាប់ ដោយសារជំងឺកូវីដ-១៩។នេះបើតាមការលើកឡើងរបស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា។
ថ្លែងនៅក្នុងពិធីអបអរសាទរទិវាមច្ឆជាតិ ០១ កក្កដា ដែលប្រារព្ធឡើងនៅទីតាំងអាងទឹកត្រពាំងថ្ម ស្ថិតក្នុងស្រុកភ្នំស្រុក ខេត្តបន្ទាយមានជ័យ នាព្រឹកថ្ងៃសុក្រ ទី០១ ខែកក្កដា ឆ្នាំ២០២២នេះ សម្តេចតេជោ ហ៊ុន សែន បានមានប្រសាសន៍ថា ការចាប់ខ្លួនបុគ្គលម្នាក់មានរហ័សនាមឈ្មោះ អ៊ូខុង បានធ្វើឡើងបន្ទាប់ពីបុគ្គលរូបនោះ បានផ្សព្វផ្សាយករណីមនុស្សឆ្លង និងស្លាប់ដោយសារជំងឺកូវីដ-១៩ នៅខេត្តកោះកុង។
សម្តេចតេជោ ហ៊ុន សែន បានចាត់ទុកការផ្សព្វផ្សាយព័ត៌មាន ស្តីពីមនុស្សឆ្លង និងស្លាប់ ដោយសារជំងឺកូវីដ-១៩ នៅខេត្តកោះកុង ជាព័ត៌មានមិនពិត បំភ្លៃ នឹងបង្កការយល់ច្រឡំ ធ្វើឱ្យចលាចលសង្គម ខណៈបច្ចុប្បន្នកម្ពុជា នៅអាចគ្រប់គ្រងជំងឺកូវីដ-១៩ ហើយក៏ពុំមានអ្នកជំងឺកូវីដ-១៩ ណាម្នាក់ នៅក្នុងមន្ទីរពេទ្យ នោះដែរ។
ជាមួយគ្នានេះ សម្តេចនាយករដ្ឋមន្រ្តីកម្ពុជា បានបញ្ជាដល់សមត្ថកិច្ច ឱ្យធ្វើការតាមដាន និងចាប់ខ្លួនចំពោះជនណា ដែលផ្សព្វផ្សាយព័ត៌មានមិនពិត ពាក់ព័ន្ឋនឹងជំងឺកូវីដ-១៩ ដើម្បីចាត់ការតាមច្បាប់ ខណៈកម្ពុជា មានគុកសម្រាប់ដាក់អ្នកទោស៕
