ក្រោមកិច្ចសហការ​​ ក្នុងការជំរុញ​ការដាក់បញ្ចូលកម្មវិធីសិក្សាទេសចរណ៍ ទៅក្នុងកម្មវិធីសិក្សាអប់រំវិជ្ជាជីវៈជម្រើសក្នុងសា​លាចំណេះទូទៅ  ដើម្បីជាការតម្រង់ទិស និងការទាក់ទាញដល់យុវជន ក៏ដូចជាសិស្សានុសិស្ស ឱ្យឃើញពីសារៈសំខាន់នៃវិស័យទេសចរណ៍ ក្រសួងអប់រំ និងក្រសួងទេសចរណ៍ នាព្រឹកថ្ងៃទី៣០ ខែមិថុនា ឆ្នាំ២០២២នេះ បានសហការគ្នាផ្សព្វផ្សាយ និងប្រកាសដាក់ឱ្យប្រើប្រាស់ជាផ្លូវការសៀវភៅទេសចរណ៍ ដែល​ជាមុខវិជ្ជា​មួយរៀននៅថ្នាក់ទី១១ សម្រាប់​សាលាចំណេះដឹងទូទៅ​។​

ថ្លែងក្នុងឱកាសនោះ លោក ថោង ខុន លើកឡើងថា ការដាក់បញ្ចូលកម្មវិធីសិក្សាទេសចរណ៍ទៅក្នុងកម្រិតសិក្សាចំណេះដឹងទូទៅនេះ គឺជា​ទិសដៅយុទ្ធសាស្រ្ត នៃផែនការអភិវឌ្ឍធនធានមនុស្ស ក្នុងវិស័យ​ទេសចរណ៍ ដើម្បីចូលរួមជំរុញការបណ្តុះបណ្តាល និងលើកកម្ពស់ធនធានអ្នកជំនាញទេស​ចរណ៍ ឱ្យឆ្លើយតបទាំងបរិមាណ និងគុណភាពស្របតាមតម្រូវការអភិវឌ្ឍន៍ក្នុងវិស័យទេស​ចរណ៍ ដែលវិ​ស័យនេះត្រូវ​បានចាត់ទុកជាវិស័យអាទិភាពមួយដើរតួជា “មាសបៃតង” ដើម្បីរួម​ចំណែកដល់ការអភិវឌ្ឍសេដ្ឋកិច្ចសង្គម និងការការពារបរិស្ថាន ចូលរួមដល់ការ​កសាងសេដ្ឋកិច្ចបៃតងនៅកម្ពុជា ដែលជាផ្នែកគាំទ្រដល់ការសម្រេចបាននូវ​គោលដៅអភិវឌ្ឍប្រកបដោយចីរភាព (SDGs) ឆ្នាំ២០៣០ របស់អង្គការសហប្រជាជាតិ (UN)។​

ជាមួយគ្នានោះ ដើម្បីចូលរួមជំរុញការប្រើប្រាស់សៀវភៅទេសចរណ៍ នៅក្នុងកម្រិតសិក្សាចំណេះ​ដឹង​ទូទៅឱ្យកាន់តែមានប្រសិទ្ធភាព លោករដ្ឋមន្ត្រី ថោង ខុន ក៏បានស្នើ​៣ចំណុចរួមមាន៖

ទី១, ស្នើ​ក្រសួងអប់រំ​បន្តជំរុញការផ្សព្វផ្សាយ និងណែនាំពីការប្រើប្រាស់សៀវភៅថ្នាក់ទី១១នេះ ដល់សាលាចំណេះដឹងទូទៅ នៅក្រោមឱវាទ​ទាំងអស់ ព្រមទាំងបន្តផ្តល់ការគាំទ្រ និងសហការលើការចងក្រង និងរៀបចំសៀវភៅទេសចរណ៍ថ្នាក់ទី១២ និងការរៀបចំ កម្មវិធីសិក្សា​ជំនាញទេសចរណ៍ សម្រាប់ដល់បញ្ចូលក្នុងកម្រិតសិក្សាចំណេះដឹងទូទៅផ្សេងៗទៀតផងដែរ។

ទី២, ស្នើ​គ្រឹះស្ថានអប់រំ និងបណ្តុះបណ្តាលក្រោមឱវាទក្រសួងអប់រំទាំងអស់ ជួយបន្តជំរុញបណ្តុះបណ្តាលលើជំនាញទេសចរណ៍ និងបដិសណ្ឋារ​កិច្ច​ឱ្យបានច្រើន ទាំងកម្រិតជំនាញ និងគ្រប់គ្រងផ្នែកទេសចរណ៍ និងបដិសណ្ឋារកិច្ច ជាពិសេសសម្រាប់គ្រឹះស្ថានអប់រំ និងបណ្តុះបណ្តាល ដែលមិនទាន់មានការបណ្តុះបណ្តាល​ជំនាញទេសចរណ៍ ដោយរៀបចំឱ្យមានថ្នាក់សិក្សា​លើជំនាញទេសចរណ៍​។

ទី៣, ស្នើ​មន្ទីរទេសចរណ៍ និងមន្ទីរអប់រំ ​រាជធានី ខេត្តទាំងអស់ សហការជាមួយគ្រឹះស្ថានអប់រំ និងបណ្តុះបណ្តាលនៅក្នុងគោលដៅរាជធានី ខេត្តរបស់ខ្លួន ជំរុញរៀបចំការបណ្តុះបណ្តាលជំនាញទេសចរណ៍ឱ្យបានកាន់តែច្រើនផងដែរ។​

ចំណែក​លោកបណ្ឌិត អ៊ឹម កុច រដ្ឋលេខាធិការ ក្រសួងអប់រំ យុវជន និងកីឡា តំណាងលោកបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ​ ​បានបញ្ជាក់​ថា ដើម្បី​ចូលរួមលើកកម្ពស់ការយល់ដឹងរបស់សិស្សានុសិស្សលើវិស័យទេសចរណ៍ ចំពោះសិស្ស​ដែលបានរៀនចប់ត្រឹមថ្នាក់ទី៩ នឹងបន្តចូលរៀន​នៅតាមសាលាអប់រំបច្ចេកទេស រាប់ទាំងជំនាញទេសចរណ៍ រយៈពេល​៣ឆ្នាំ ក្រោយពេលប្រឡងបានជោគជ័យ និងទទួល​បានសញ្ញាបត្រមួយ​ដែលមានតម្លៃស្មើនឹងសញ្ញាបត្របាក់ឌុបផងដែរ ដែលបេក្ខជនអាចស្នើសុំសញ្ញាបត្រនេះ ដែលមានការបោះត្រា និងចុះហត្ថលេខាដោយ​ក្រសួងអប់រំ យុវជន និងកីឡា ផងដែរ៕