ភ្នំពេញ៖ ជំងឺកូវីដ-១៩ ដែលស្ងប់ស្ងាត់អស់រយៈពេលជាង១ខែកន្លងទៅនេះ បានចាប់ផ្តើមកើតមានជាថ្មីទៀត ហើយសម្តេចតេជោ ហ៊ុន សែន នាយករដ្ឋមន្រ្តីកម្ពុជា បានចេញសារមួយបន្ទាន់ កាលពីយប់ថ្ងៃទី២៨ ខែមិថុនា ឆ្នាំ២០២២ ដោយអំពាវនាវឱ្យប្រជាពលរដ្ឋមានការប្រុងប្រយ័ត្ន និងត្រូវអនុវត្តតាមវិធានការរបស់ក្រសួងសុខាភិបាល។

នៅក្នុងសារសំឡេងនាយប់ថ្ងៃទី២៨ ខែមិថុនា ឆ្នាំ២០២២ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍លើកឡើងថា ជំងឺកូវីដ-១៩ បានចាប់ផ្តើមមានការឆ្លងឡើងវិញ នៅក្នុងសហគមន៍។ការឆ្លងនេះ ត្រូវបានរកឃើញតាមរយៈម៉ាស៊ីន PCR និងឧបករណ៍ធ្វើតេស្តរហ័ស លើពលរដ្ឋមួយចំនួនក្នុងសហគមន៍ និងអ្នកដំណើរចេញចូលក្នុង និងក្រៅប្រទេស។

សម្តេចតេជោ ហ៊ុន សែន បានអំពាវនាវឱ្យមានវិធានការការពារផ្ទាល់ខ្លួន ហើយគ្រប់ទីកន្លែងទាំងអស់ត្រូវមានភាពហ្មត់ចត់តាមដានលើការវិវត្ត ដោយមន្ទីរ និងក្រសួងសុខាភិបាល ព្រមទាំងអាជ្ញាធរពាក់ព័ន្ឋ ដើម្បីបញ្ចៀសករណី នៃការរីករាលដាលធ្ងន់ធ្ងរជាយថាហេតុ ខណៈការឆ្លងនេះ បានកើតមានជាច្រើនកន្លែងមកហើយ។

ជាមួយគ្នានេះ សម្តេច នាយករដ្ឋមន្រ្តីកម្ពុជា បានជំរុញដល់ប្រជាពលរដ្ឋត្រូវប្រញាប់ប្រញាល់ទៅទទួលវ៉ាក់សាំងដូសជំរុញ ព្រោះប្រសិនបើមិនមានវិធានការហ្មត់ចត់ទេនោះ កម្ពុជានឹងវិលត្រលប់ទៅរកស្ថានការណ៍ដ៏អាក្រក់ជាមិនខាន។

គួរកត់សម្គាល់ថា កម្ពុជា មានភាពស្ងប់ស្ងាត់ជំងឺកូវីដ-១៩ អស់រយៈពេលជាង១ខែកន្លងទៅនេះ ដោយពុំមានពលរដ្ឋណាម្នាក់ បានឆ្លងជំងឺកូវីដ-១៩ នោះឡើយ ហើយអ្នកជំងឺភាគច្រើនក៏បានជាសះស្បើយ និងវិលត្រលប់ទៅផ្ទះវិញដែរ។

របាយការណ៍របស់ក្រសួងសុខាភិបាល បានឱ្យដឹងថា គិតត្រឹមថ្ងៃទី២៨ ខែមិថុនា ឆ្នាំ២០២២ មានពលរដ្ឋកម្ពុជា ចំនួន៩៤,២៧ភាគរយ នៃចំនួនប្រជាជនសរុប ១៦លាននាក់ បានទទួលវ៉ាក់សាំងកូវីដ-១៩៕