បុណ្យសមុទ្រលើកទី៩ ជុំទី៣ ដែលគ្រោងនឹងរៀបចំនៅខេត្តព្រះសីហនុនោះ នឹងត្រូវរៀបចំឡើងរយៈពេល៣ថ្ងៃ ដោយចាប់ពីថ្ងៃទី០៩ ដល់ថ្ងៃទី១១ ខែធ្នូ ឆ្នាំ២០២២ នេះបើតាមការឲ្យដឹងពីក្រសួងទេសចរណ៍ នៅក្នុងកិច្ចប្រជុំមួយកាលពីម្សិលមិញ។
ពិធីបុណ្យនេះ ធ្វើឡើងដើម្បីទាក់ទាញភ្ញៀវទេសចរណ៍ជាតិ អន្តរជាតិ ក៏ដូចជាអ្នកវិនិយោគឲ្យចូលមកកម្ពុជា កាន់តែច្រើនឡើងថែមទៀត ហើយក៏ជាឱកាស ដើម្បីផ្សព្វផ្សាយពីគោលដៅទេសចរណ៍តំបន់ឆ្នេរសមុទ្រ ទៅកាន់ទីផ្សារទេសចរណ៍អន្តរជាតិ ឱ្យកាន់តែល្បីល្បាញបន្ថែមទៀតផងដែរ ខណៈឆ្នេរសមុទ្រកម្ពុជាទាំងអស់ (ព្រះសីហនុ កំពត កែប និងកោះកុង) ត្រូវបានអង្គការឆ្នេរសមុទ្រដែលស្អាតជាងគេលើពិភពលោក បានចាត់បញ្ចូលជាឆ្នេរសមុទ្រដែលស្អាតជាងគេនៅលើពិភពលោក ហើយរាជរដ្ឋាភិបាលកម្ពុជាក៏បានប្រសិទ្ធនាមតំបន់ឆ្នេរសមុទ្រទាំង៤ នោះ ថាជា "តារារះនាទិសនិរតី" ផងដែរ។
លោក ថោង ខុន រដ្ឋមន្ត្រីក្រសួងទេស ចរណ៍ និងជាប្រធានគណៈកម្មការអន្តរក្រសួង ដើម្បីរៀបចំបុណ្យសមុទ្រ បានលើកឡើងថា ស្ថិតក្នុងដំណាក់កាលក្រោយកូវីដ១៩នេះ និន្នាការនៃការធ្វើ ដំណើរកម្សាន្តរបស់ភ្ញៀវទេសចរ មិនមានច្រើនដូចមុនកូវីដនោះទេ ដោយសាតែកត្តាជីវភាព ទាំងភ្ញៀវក្នុងស្រុក និងក្រៅស្រុក ដូចនេះវិស័យឯកជន គួរកែប្រែលើកកម្ពស់គុណភាពសេវារបស់ខ្លួនឱ្យល្អ ហើយត្រូវរៀបចំកញ្ចប់សេវាទស្សនកិច្ចរបស់ខ្លួនឱ្យកាន់តែរស់រវើក និងតម្លៃឱ្យបានសមសម្យ។
លោក ថោង ខុន បានបង្ហាញជំនឿជាក់ថា បើសិនជាវិស័យឯកជនរៀបចំតម្លៃតម្លៃទស្សនកិច្ចបានថោកសមរម្យ ព្រមជាមួយនឹងការធ្វើដំណើរតាមច្រកទ្វារអន្តរជាតិ ចូលមកក្នុងប្រទេសកម្ពុជា កាន់តែមានភាពងាយស្រួលផងនោះ វិស័យទេសចរណ៍នៅកម្ពុជា នឹងកើនឡើងបន្ថែមទៀត។
ជាមួយនឹងការលើកឡើងខាងលើនេះ លោករដ្ឋមន្ត្រីបានអំពាវនាវដល់ផ្នែកឯក ជនទាំងអស់ ត្រូវរៀបចំដាក់ចុះនូវតម្លៃកញ្ចប់ទស្សនកិច្ចឱ្យបានសមរម្យ និងសមស្របសម្រាប់ភ្ញៀវទេសចរអាចទទួលយកបាន ដើម្បីជាការប្រកួតប្រជែងសម្រាប់តម្លៃទីផ្សារសម្រាប់ទាក់ទាញទាំងភ្ញៀវជាតិ និងភ្ញៀវអន្តរជាតិ។
សូមបញ្ជាក់ថា ពិធីបុណ្យសមុទ្រលើកទី៩ ជុំទី៣ នឹងរៀបចំឡើងចាប់ពីថ្ងៃទី៩ ដល់ថ្ងៃទី១១ ខែធ្នូ ឆ្នាំ២០២២ ស្របជាមួយនិងមហាសន្និបាតក្លឹបឆ្នេរសមុទ្រ ដែលស្អាតបំផុតលើពិភពលោក ចាប់ពីថ្ងៃទី៩ ដល់ថ្ងៃទី១៤ ខែធ្នូ ឆ្នាំ២០២២ នៅលើទឹកដីខេត្តព្រះសីហនុ ក្រោមអធិបតីភាពដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន៕
