លោក ង៉ូវ សេងកាក់ ប្រធានមន្ទីរទេសចរណ៍សៀមរាបបានឲ្យដឹងថា ក្នុងរយៈពេល០៥ខែដើមឆ្នាំ២០២២ នេះមានជើងហោះហើរចូលទៅកាន់ខេត្តសៀមរាបចំនួន២៩២ ក្នុងនោះមានអ្នកដំណើរសរុបចំនួន២៤.៥៥១នាក់។
បើតាមលោក ង៉ូវ សេងកាក់ ក្នុងចំណោមជើងហោះហើរទាំងនោះជើងហោះហើរជាលក្ខណៈអន្តរជាតិរួមាន៖ ក្រុមហ៊ុន Singapore Airline (សឹង្ហបុរី-សៀមរាប) មានចំនួន១៥១ ជើង អ្នកដំណើរ១៧.២០១ នាក់, ក្រុមហ៊ុន Air Asia (កូឡាឡាំពួរ-សៀមរាប) មានចំនួន១២ជើង អ្នកដំណើរ ១.៥៤៥ នាក់, ក្រុមហ៊ុន Thai Smile (បាងកក-សៀមរាប) មានចំនួន១០ ជើង អ្នកដំណើរ ៩៤៧ នាក់, ក្រុមហ៊ុន China Eastern (គួនមីង-សៀមរាប) មានចំនួន ០២ ជើង អ្នកដំណើរ១៧១ នាក់, ក្រុមហ៊ុន Bangkok Air (បាងកក-សៀមរាប) មានចំនួន ០១ ជើង អ្នកដំណើរ ៦៣ នាក់, ក្រុមហ៊ុន Air Iceland (GUM-REP) មានចំនួន ០១ ជើង អ្នកដំណើរ ៣៨ នាក់ ហើយមកជាលក្ខណៈ Charter Flight មានចំនួន២៩ ជើង អ្នកដំណើរ១៨៥ នាក់។
ដោយឡែកជើងហោះហើរក្នុងស្រុករួមមាន៖ ក្រុមហ៊ុន Cambodia Angkor Air (ភ្នំពេញ-សៀមរាប) មានចំនួន៨៤ ជើង អ្នកដំណើរ ៤.១៤៧ នាក់, ក្រុមហ៊ុន Cambodia Airway (ភ្នំពេញ-សៀមរាប) មានចំនួន០២ ជើង អ្នកដំណើរ២១៤ នាក់។
ជាការកត់សំគាល់ ក្រុមហ៊ុន Air Asia បានចាប់ផ្តើការហោះហើរ (កូឡាឡាំពួរ-សៀមរាប) កាលពីថ្ងៃទី២៥ ខែមេសា ឆ្នាំ២០២២ រហូតដល់បច្ចុប្បន្ន ដោយធ្វើការហោះហើរ២ជើងក្នុងមួយសប្តាហ៍ (ពីថ្ងៃពុធ និងថ្ងៃអាទិត្យ) និងពីបាងកក-សៀមរាប ចាប់ពីថ្ងៃទី០២ ខែមិថុនា ឆ្នាំ២០២២ មានចំនួន៣ជើង ក្នុងមួយសប្តាហ៍ (ថ្ងៃអង្គារ ព្រហស្បតិ៍ និងថ្ងៃសៅរ៍)។
សូមបញ្ជាក់ថា រយៈពេល០៥ខែ ឆ្នាំ២០២២នេះដែរ ខេត្តសៀមរាបទទួលបានភ្ញៀវទេសចរសរុបប្រមាណ១.០២៧.៧៧៩នាក់កើនឡើង៧៤៤,៨៧ ភាគរយ ប្រៀបធៀបរយៈពេលដូចគ្នាឆ្នាំ២០២១ ចំនួនប្រមាណ១២១.៦៤៩ នាក់ ដែលក្នុងនោះ៖ ភ្ញៀវទេសចរអន្តរជាតិ មានចំនួន ៤៥.៧៧៩ នាក់ កើនឡើង៨៥៩,៩២ ភាគរយ បើប្រៀបធៀបនឹងរយៈពេលដូចគ្នា ឆ្នាំ២០២១ មានចំនួន ៤.៧៧៤ នាក់ ។ ភ្ញៀវទេសចរជាតិ មានចំនួនប្រមាណ៩៨២.០០០ នាក់ មានការកើនឡើងចំនួន៧៤០,២១ ភាគរយ បើប្រៀបធៀបនឹងរយៈពេលដូចគ្នាឆ្នាំ២០២១ ចំនួនប្រមាណ ១១៦.៨៧៥ នាក់៕
