គម្រោងវិនិយោគកន្លែងកម្សាន្តកីឡាទេសចរណ៍លើសមុទ្រ ដែលជាផលិតផលទេសចរណ៍ថ្មីនេះ នឹងត្រូវសាងសង់ឡើងដោយក្រុមហ៊ុន ឡឹសូឡីមីឡាន អិនធើណេសិនណលត្រាវែល ឯ.ក LE SOLEIL MEILAN INTERNATIONNAL TRAVEL Co.,LDT ហើយត្រូវបានធ្វើបទបង្ហាញកាលពីថ្ងៃពុធ ទី២២ ខែមិថុនា ឆ្នាំ២០២២ម្សិលមិញ ក្រោមអធិបតីភាពលោក គួច ចំរើន អភិបាលនៃគណអភិបាលខេត្តព្រះសីហនុ។
បើតាមតំណាងក្រុមហ៊ុន គម្រោងស្នើសុំវិនិយោគ កន្លែងកម្សាន្តកីឡាទេសចរណ៍លើសមុទ្រនេះគឺមានទីតាំងស្ថិតនៅឆ្នេរអូរឈើទាល២ ភូមិ៤ សង្កាត់លេខ៤ ក្រុងព្រះសីហនុ គឺនៅទល់មុខនឹងអគាររបស់ក្រុមហ៊ុនតែម្តងដោយទីតាំងស្នើសុំមានទំហំទទឹង១០០ម៉ែត្រ បណ្តោយ១៥០ម៉ែត្រ និងចម្ងាយពីឆ្នេរចូលទៅក្នុងទឹកសមុទ្រប្រមាណ២០ម៉ែត្រ មិនប៉ះពាល់នឹងលំហរឆ្នេរសាធារណៈនោះទេ។
ចំណែកសួនកម្សាន្តកីឡាទេសចរណ៍នៅលើសមុទ្រគឺក្រុមហ៊ុននឹងរៀបចំរួមមាន ប្រាសាទទឹក, បាល់ទះលើទឹក, ពោងបង្វិលលើទឹក, ពោងរត់បង្វិលលើទឹក, ទូកពោងរាងផ្លែចេក, ទូកចែវ, ពោងបណ្តែតកម្សាន្តលើទឹក, ស្ពានដើរបណ្តែតទឹក, ទោងជិះកម្សាន្ត, និងមានក្រុមម៉ូតូទឹក ក៏ដូចជាបុគ្គលិកសម្រាប់ជួយសង្គ្រោះផងដែរ។ តំណាងក្រុមហ៊ុនអះអាងថា គម្រោងនេះរៀបចំឡើងក្រោយពីពិនិត្យឃើញពីសក្តានុពលនិងភាពរីកចម្រើនរបស់ខេត្តព្រះសីហនុ ហើយគម្រោងនេះមានទុនវិនិយោគចំនួន៥០ម៉ឺនដុល្លាអាមេរិក។
ចំណែកលោក គួច ចំរើន អភិបាលខេត្តព្រះសីហនុ បានគាំទ្រគម្រោងនេះនិងបានអះអាងថា កីឡាទេសចរណ៍លើទឹកនេះជាផលិតផល ទេសចរណ៍ថ្មី សម្រាប់ខេត្តព្រះសីហនុ និងបង្កើតការងារដល់ប្រជាពលរដ្ឋ ព្រមទាំងទាក់ទាញភ្ញៀវទេសចរណ៍ចូលមកកម្សាន្តនិងស្នាក់នៅខេត្តព្រះសីហនុកាន់តែច្រើន។ ជាមួយគ្នានេះ លោកបានធ្វើការណែនាំដល់ក្រុមហ៊ុន ត្រូវសិក្សាពីតម្លៃសេដ្ឋកិច្ចសង្គមនិងចំនួនភ្ញៀវមកកំសាន្ត ក៏ដូចជាសិក្សាអំពីលក្ខណៈបច្ចេកទេស អាកាសធាតុ ការការពារសុវត្ថិភាពភ្ញៀវ និងផលប៉ះពាល់បរិស្ថានឱ្យបានគ្រប់ជ្រុងជ្រោយ ដើម្បីរដ្ឋបាលខេត្តមានមូលដ្ឋានក្នុងការស្នើសុំគោលការណ៍ទៅគណៈកម្មាធិការជាតិគ្រប់គ្រងនិងអភិវឌ្ឍន៍តំបន់ឆ្នេរសមុទ្រកម្ពុជាដើម្បីអនុវត្តនីតិវិធីបន្ត៕
