ភ្នំពេញ ៖ យានយន្តចំនួន ១៨៥គ្រឿង ត្រូវបានសមត្ថកិច្ចជំនាញធ្វើការផាកពិន័យ តាមអនុក្រឹត្យលេខ៣៩.អនក្រ.បក ក្រោយពេលរកឃើញថា បានល្មើសនឹងច្បាប់ស្ដីពីចរាចរណ៍ផ្លូវគោក។

តាមរបាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានឱ្យដឹងនៅរសៀលថ្ងៃទី២៣ ខែមិថុនា ឆ្នាំ២០២២ថា ការរឹតបន្ដឹងច្បាប់ស្ដីពីចរាចរណ៍ផ្លូវគោក នាថ្ងៃនេះសមត្ថកិច្ចបានដាក់គោលដៅសរុប ចំនួន១២៨ និងមានយានយន្តចូលគោលដៅចំនួន ២.៧៤៨គ្រឿង ក្នុងនោះមានម៉ូតូ ២.១៤៦គ្រឿង។

របាយការណ៍ដដែលបានបញ្ជាក់ថា នៅក្នុងការរឹតបន្តឹងនេះ សមត្ថកិច្ចរកឃើញ យានយន្តល្មើសសរុបចំនួន ១៨៥គ្រឿង មានម៉ូតូចំនួន ១៧១គ្រឿង ត្រូវបានផាកពិន័យតាមអនុក្រឹត្យ នៅទូទាំងប្រទេស។

របាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានឱ្យដឹងដែរថា ក្នុងរយៈពេល២៣ថ្ងៃ (ចាប់ពីថ្ងៃទី០១-២៣ខែមិថុនា) ការរឹតបន្ដឹងការអនុវត្តច្បាប់ស្ដីពីចរាចរណ៍ផ្លូវគោក មានយានយន្តចូលគោលដៅមានចំនួន ៤១.៤៧៥គ្រឿង ក្នុងនោះរកឃើញយានយន្តល្មើសសរុបចំនួន ៥.១១៣គ្រឿង ម៉ូតូមានចំនួន ៥៥២គ្រឿង ត្រូវបានផាកពិន័យ។

របាយការណ៍ដដែលបានវាយតម្លៃថា រយៈពេល២៣ថ្ងៃ នៃខែមិថុនានេះ ឃើញថា ការអនុវត្តតាមអនុក្រឹត្យ ការផាកពិន័យយានយន្តល្មើស បានដំណើរការទៅយ៉ាងល្អប្រសើរ និងទទួលបានការគាំទ្រពីអ្នកប្រើប្រាស់ផ្លូវទាំងអស់៕

អត្ថបទ៖លាង ឡា