កោះកុង៖ ក្រុមអ្នកជំនាញកំពុងពន្លឿនការសាងសង់កំពង់ផែដងទង់ ស្ថិតក្នុងក្រុងខេមរភូមិន្ទ ខេត្តកោះកុង ខណៈផែនការសម្ពោធនឹងត្រៀមធ្វើឡើង នៅអំឡុងចុងឆ្នាំ២០២២នេះ។

នៅថ្ងៃទី២៣ ខែមិថុនា ឆ្នាំ២០២២នេះ លោកទេសរដ្ឋមន្ដ្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំក្រុមការងារបច្ចេកទេសក្រសួង ចុះពិនិត្យវឌ្ឍនភាពគម្រោងសាងសង់កំពង់ផែដងទង់ ដោយមានការអញ្ជើញចូលរួមពីថ្នាក់ដឹកនាំក្រសួង អាជ្ញាធរដែនដី និងភាគីពាក់ព័ន្ធផងដែរ។

ក្រសួងសាធារណការ និងដឹកជញ្ជូន បានឱ្យដឹងថា កំពង់ផែដងទង់ គឺជាកំពង់ផែខ្នាតមធ្យម មានទំហំ ១១៥ម៉ែត្រ x ១៦,៥ម៉ែត្រ សាងសង់ឡើងសម្រាប់បម្រើដល់នាវាទេសចរណ៍ ក្រោមកិច្ចព្រមព្រៀងបណ្តោយឆ្នេរសមុទ្រប្រទេសកម្ពុជា វៀតណាម និងថៃ ។

ក្រសួងសាធារណការ និងដឹកជញ្ជូន រំពឹងថា កំពង់ផែនេះ នឹងជួសម្រួលដល់នាវាដឹកទំនិញ    កសិផលមកពីបណ្តាខេត្តមួយចំនួន នៅប៉ែកពាយព្យប្រទេស រួមមាន៖ ខេត្តបាត់ដំបង បៃលិន ពោធិ៍សាត់ បន្ទាយមានជ័យ ឧត្តរមានជ័យ ព្រមទាំង បម្រើដល់ការ នាំចូលទំនិញពីប្រទេសវៀតណាម និងថៃ ផងដែរ។

ជាមួយគ្នានេះ ក្រសួងសាធារណការ និងដឹកជញ្ជូន បានបញ្ជាក់ថា កំពង់ផែនេះ គ្រោងនឹងបញ្ចប់ការសាងសង់ជាស្ថាពរ និងសម្ពោធដាក់ឱ្យដំណើរការជាផ្លូវការ នៅក្នុងចុងឆ្នាំ២០២២នេះ៕

អត្ថបទ៖លាង ឡា