ពិធីចែកពាននេះ បានធ្វើឡើងនៅក្នុងសិក្ខាសាលា ដើម្បីលើកកម្ពស់សុវត្ថិភាព សុខុមាលភាពសកល ម្សិលមិញនាព្រឹកថ្ងៃទី១៤ ខែមិថុនា ឆ្នាំ២០២២នេះ ក្រោមអធិបតីលោក ហោ សារុន រដ្ឋលេខាធិការ ក្រសួងទេសចរណ៍ និងមានការចូលរួមពីលោក ស្រេង ហុង អភិបាលរងនៃគណៈអភិបាលខេត្តកោះកុង ព្រមទាំងអ្នកពាក់ព័ន្ធជាច្រើន។
ថ្លែងនៅក្នុងពិធីនោះ លោក ស្រេង ហុង បានលើកឡើងថា ខេត្តកោះកុង ជាខេត្តមួយដែលសម្បូរទៅដោយធនធានធម្មជាតិ ព្រៃភ្នំ ជ្រោះជ្រង ជ្រលងដងអូរ ស្ទឹង ព្រែកជាច្រើន ដែលកត្តាទាំងអស់នេះ បានអំណោយផលទៅដល់ការអភិវឌ្ឍន៍វិស័យអេកូទេសចរណ៍បែបធម្មជាតិ ជាពិសេសខេត្តក៏មានឆ្នេរសមុទ្រវែងជាងខេត្តតំបន់ឆ្នេរទាំងបីទៀត ហើយត្រូវបានបញ្ចូលជាសមាជិកក្លឹបឆ្នេរស្អាតជាងគេលើសកលលោក ដែលត្រូវបានប្រសិទ្ធិនាមថា តារារះនាទិសនិរតី។
បើតាមលោក ស្រេង ហុង ខេត្តកោះកុង ត្រូវបានរាជរដ្ឋាភិបាលដាក់ជាគោលដៅខេត្តអេកូទេសចរណ៍តំបន់ឆ្នេរផងដែរ។ រយៈពេល២ឆ្នាំកន្លងមកនេះ វិស័យទេសចរណ៍របស់ពិភពលោក ក៏ដូចជាទេសចរណ៍កម្ពុជា បាននឹងកំពុងទទួលផលប៉ះពាល់យ៉ាងធ្ងន់ធ្ងរដោយការរីករាលដាលជម្ងឺកូវីដ-១៩។ លោកថា រាជរដ្ឋាភិបាលកម្ពុជា ក្រោមការដឹកនាំប្រកបដោយកិត្តិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន បានដាក់ចេញនូវវិធានការឆ្លើយតបយ៉ាងម៉ឺងម៉ាត់ដាច់ខាត និងម៉ត់ចត់ ដ៏មានប្រសិទ្ធិភាព និងទាន់ពេលវេលាក្នុងការទប់ស្កាត់ការឆ្លងរីករាលដាលនៃជម្ងឺកូវីដ-១៩ ជាពិសសគោលនយោបាយវ៉ាក់សាំងជូនប្រជាពលរដ្ឋ ធ្វើឱ្យប្រទេសរបស់យើងអាចបើកដំណើរការឡើងវិញគ្រប់វិស័យ ក្នុងនោះស្ថានភាពទេសចរណ៍បានងើបឡើងគួរឱ្យកត់សំគាល់។
ក្នុងឱកាសនោះដែរ លោកបានថ្លែងអំណរគុណចំពោះក្រសួងទេសចរណ៍ ក្រសួងសុខាភិបាល និងដៃគូអភិវឌ្ឍន៍ ដែលបានរៀបចំសិក្ខាសាលា និងពិធីចែកពានស្ដីពី “បរិស្ថានគ្មានផ្សែងបារីក្នុងវិស័យទេសចរណ៍” ដល់បណ្ដាអាជីវកម្ម សេវាកម្ម ដែលបានខិតខំអនុវត្ត បានត្រឹមត្រូវតាមសេចក្ដីណែនាំ ស្ដីពីបរិស្ថានគ្មានផ្សែងបារី ដល់ម្ចាស់មូលដ្ឋានអាជីវកម្ម សេវាកម្មទេសចរណ៍ទូទាំងព្រះរាជាណាចក្រកម្ពុជា។
លោកអភិបាលរងបញ្ជាក់ថា កម្ពុជា ក៏ជាប្រទេសមួយដែលទទួលរងគ្រោះដោយផលិតផលថ្នាំជក់ផងដែរ ហើយអ្នកគាំទ្រ និងប្តេជ្ញាអនុវត្តតាមគោលការណ៍ណែនាំ ដែលបានចែងក្នុងអនុសញ្ញាត្រួតពិនិត្យថ្នាំជក់របស់អង្គការសុខភាពពិភពលោក ដើម្បីកាត់បន្ថយការប្រើប្រាស់ផលិផលថ្នាំជក់។
ចំណែកលោក ហោ សារុន បានលើកឡើងថា បរិស្ថានគ្មានផ្សែងបារី ក្នុងវិស័យទេសចរណ៍ មិនត្រឹមតែចូលរួមលើកកម្ពស់សុខុមាលភាពរបស់ប្រជាពលរដ្ឋ និងទេសចរប៉ុណ្ណោះទេ ថែមទាំងចូលរួមកាត់បន្ថយឱកាសនៃការឆ្លងរីករាលដាល នៃជំងឺកូវីដ-១៩ តាមរយៈការយកដៃមិនស្អាតទៅប៉ះមាត់នៅពេលជក់បារី និងការខូចខាតសួត ដោយសារផ្សែងបារី ហើយបរិស្ថានគ្មានផ្សែងបារី ក្នុងវិស័យទេសចរណ៍ ក៏បានចូលរួមចំណែកយ៉ាងសំខាន់ក្នុងធានាបានថា កម្ពុជា គឺជាគោលដៅទេសចរណ៍សុវត្ថិភាព ស្អាត និងបៃតងផងដែរ។
បើតាមលោក ហោ សារុន ការផ្តល់ពាន និងប័ណ្ណសរសើរដល់ម្ចាស់អាជីវកម្ម៥៦ កន្លែង លើសេវាកម្មទេសចរណ៍ ភោគជនីយដ្ឋាន និងអាហារដ្ឋាននេះ ដើម្បីកិច្ចសហការ អនុវត្តរបស់អ្នកពាក់ព័ន្ធ បានល្អពីទប់ស្កាត់ការជក់បារី តាមតំបន់ទេសចរណ៍ ដែលត្រូវហាមប្រាម។
គួរបញ្ជាក់ថា ចាប់តាំងពីដើមឆ្នាំ២០២០ ដល់ឆ្នាំ២០២១ វិស័យទេសចរណ៍កម្ពុជា ក៏ដូចជាពិភពលោក បានទទួលរងផលប៉ះពាល់អវិជ្ជមានយ៉ាងខ្លាំងដោយសារវិបត្តិជំងឺកូវីដ-១៩។ ក្នុងឆ្នាំ២០២០ កម្ពុជាទទួលបានភ្ញៀវទេសចរអន្តរជាតិចំនួន ១,៣ លាននាក់ ថយចុះ៨០,២ភាគរយ ប្រៀបធៀបទៅនឹងឆ្នាំ២០១៩ ជាមួយការបាត់បង់ប្រាក់ចំណូលប្រមាណ ៣ ពាន់លានដុល្លារអាមេរិក។ ក្នុងឆ្នាំ២០២១ វិញ កម្ពុជាទទួលបានភ្ញៀវទេសចរអន្តរជាតិប្រមាណ១៩ ម៉ឺននាក់ ថយចុះ៨៥ ភាគរយ ធៀបរយៈពេលដូចគ្នាក្នុងឆ្នាំ២០២០៕
