ជនជាតិអង់គ្លេស២នាក់ និងម៉ារ៉ុក១នាក់ ដែលបានប្រយុទ្ធដើម្បីកងទ័ពអ៊ុយក្រែន ត្រូវបានផ្តន្ទាទោសប្រហារជីវិតកាលពីថ្ងៃព្រហស្បតិ៍ ដោយតុលាការនៅក្នុងភាគខាងកើតអ៊ុយក្រែន ដែលកាន់កាប់ដោយរុស្ស៊ី បន្ទាប់ពីបានរងនូវការចោទប្រកាន់ថា បានស៊ីឈ្នួលធ្វើសង្រ្គាម ទីភ្នាក់ងារសារព័ត៌មាន Tass របស់រុស្ស៊ីបានរាយការណ៍។ ការកាត់ទោសប្រហារជីវិតនេះ វាជាជំហ៊ានចុងក្រោយនៃការគំរាមកំហែងនៅក្នុងការកាត់ទោស ដែលបានប្រកាសអាសន្នចំពោះអ្នក ដែលនិយាយពីសិទ្ធមនុស្ស និងរដ្ឋាភិបាលលោកខាងលិច ដែលបានលើកជាសំណួរអំពីការការពារដែលអាចធ្វើទៅបានលើអ្នកប្រយុទ្ធជាច្រើនពាន់នាក់ ដែលជាជនជាតិបរទេសដែលបានបំរើក្នុងកងទ័ពអ៊ុយក្រែនពួកគេខ្លះ ត្រូវបានចាប់ខ្លួនជាឈ្លើយសឹកនៅក្នុងសមរភូមិ។

រដ្ឋមន្ត្រីក្រសួងការបរទេសអង់គ្លេស Liz Truss បានសរសេរនៅក្នុង Twitter ថាសាលក្រមរបស់តុលាការវាជា "ការវិនិច្ឆ័យមួយដ៏គួរឲ្យខ្មាស់អៀន និងគ្មានលក្ខណៈស្របច្បាប់អ្វីបន្តិចទាល់តែសោះ" សមាជិកសភាអង់គ្លេសម្នាក់បានហៅការអនុវត្តិនិតិវិធីច្បាប់នេះថាវាជា “សវនាការកាត់ទោសនៅក្នុងសករាជសហភាពសូវៀតដែលគ្រាន់តែបង្រ្គប់កិច្ច”។ រដ្ឋអាជ្ញាបានចោទប្រកាន់បុរសទាំង៣នាក់ Aiden Aslin អាយុ២៨ឆ្នាំ, Shaun Pinner អាយុ៤៨ឆ្នាំ, និង Brahmin Sadoun ថាជាអ្នកស៊ីឈ្នួលធ្វើសង្រ្គាម និងជាភេវរករដែលស្វែងរកការផ្តួលរំលំរដ្ឋាភិបាលនៃសាធារណរដ្ឋប្រជាមានិត Donetsk ដែលជាតំបន់បំបែកខ្លួននៅភាគខាងកើតអ៊ុយក្រែនដែលរុស្ស៊ីបានទទួលស្គាល់។

ប៉ុន្តែមេធាវីដែលការពារអ្នកទាំង៣បាននិយាយថា ពួកគេជាជនអន្តោប្រវេសន៍ដែលបានចូលមកក្នុងប្រទេសអ៊ុយក្រែន ហើយបានស្នាក់នៅទីនោះព្រមទាំងបានប្រយុទ្ធសំរាប់កងទ័ពរបស់ប្រទេសដែលគេផ្ញើរខ្លួន មុនពេលដែលគេត្រូវបានបោកបញ្ឆោតឲ្យធ្លាក់ចូលទៅក្នុងការកាត់ទោស ដែលសវនាការនេះហាក់ដូចជាមានការកំណត់ទុកជាមុន។ ការកាត់ទោសដ៏ឃោឃៅនេះបានទទួលនូវការតវ៉ានិងកំហឹងយ៉ាងឆាប់រហ័សពីរដ្ឋាភិបាលអង់គ្លេស។ អ្នកនាំពាក្យម្នាក់របស់លោកនាយករដ្ឋមន្ត្រី Boris Johnson នៃប្រទេសអង់គ្លេសបាននិយាយថា "ឈ្លើយសឹកមិនគួរត្រូវបានគេយកទៅធ្វើការកេងចំណេញលើគោលបំណងនយោបាយទេ" បើយោងទៅតាម BBC ។

អ្នកជំនាញខាងច្បាប់បាននិយាយថា សវនាការនេះវាហាក់ដូចជា ត្រូវបានគេគណនាដើម្បីបំបាក់ទឹកចិត្តអ្នកស្ម័គ្រចិត្តបរទេស រួមបញ្ចូលទាំងជនជាតិអាមេរិកាំង ពីការចូលរួមជាមួយយោធាអ៊ុយក្រែន ដោយព្រមានពួកគេថា ពួកគេអាចនឹងត្រូវបានបដិសេធពីការការពារខ្លួនក្នុងនាមជាអ្នកទោសសង្រ្គាមដែលស្ថិតនៅក្រោមសន្ធិសញ្ញាទីក្រុងហ្សឺណែវ។ ប៉ុន្តែកាលពីថ្ងៃព្រហស្បតិ៍ មន្ត្រីតុលាការនៅក្នុងសាធារណរដ្ឋប្រជាមានិតុ Donetsk ដែលជាកងកម្លាំងសម្ព័ន្ធមិត្តរុស្ស៊ីបានប្រយុទ្ធជាមួយកងទ័ពអ៊ុយក្រែន ចាប់តាំងពីឆ្នាំ២០១៤ បានសង្កត់បន្ថែមទៀត ដោយបានអះអាងថា បុរសទាំង៣នាក់នេះជាអ្នកស៊ីឈ្នួលប្រយុទ្ធដ៏សហាវយង់ឃ្នងដែលសមនឹងស្លាប់៕