មន្រ្ដីការិយាល័យបេតិកភណ្ឌចំនួន៣រូប នៃខេត្តកំពង់ស្ពឺ កាលពីថ្ងៃពុធ ទី០៨ ខែមិថុនា ឆ្នាំ២០២២ បានចុះពិនិត្យបុរាណដ្ឋាននៅឃុំចំនួន២ កន្លែងគឺឃុំត្រពាំងជោរ ភូមិល្ងឹម និងឃុំសង្កែសាទប ភូមិពាម (អាស្រមយាយទេព ឬអាស្រមថ្មហោង ភូមិល្ងឹម និង អង្គព្រះគោ ឬទួលប្រាសាទព្រះគោ ភូមិពាម)។
អាស្រមយាយទេព ឬអាស្រមថ្មហោង ស្ថិតក្នុងបរិវេណវត្តឧត្ដមថ្មហោង ហៅវត្តល្ងឹម មានទំហំផ្ទៃដីអភិរក្សទុកតាំងពីអំឡុងឆ្នាំ១៩៩៤ ប្រមាណ៣៧ហិកតា ដែលមានទីតាំងគំនូពណ៌ចាស់ (បុរាណ) មួយកន្លែងបានរក្សាស្ថានភាពល្អ ព្រមទាំងមានកោដ្ឋចាស់ៗជាច្រើនអំឡុងឆ្នាំ១៩៤៥?។
ចំណែកទួលប្រាសាទព្រះគោ ដែលបានចុះបញ្ជីដោយមន្ទីរវប្បធម៌ និងវិចិត្រសិល្បៈខេត្តតាំងពីអំឡុងឆ្នាំ១៩៩៥ និងបានចុះពិនិត្យដោយថ្នាក់ដឹកនាំមន្ទីរ និងមន្រ្ដីជំនាញនាឆ្នាំ២០១៩។ នៅឆ្នាំ២០២២ ដោយសង្កេតឃើញថាតំបន់បរិវេណទួលមានការប្រឈមនឹងចូលទន្រ្ទានយកដី និងការដាំបង្គោលគ្រាក់ដែលប៉ះពាល់ដល់ទីទួល ថ្នាក់ដឹកនាំមន្ទីរក៏បានចាត់មន្រ្ដីជំនាញចុះពិនិត្យស្ថានភាពជាថ្មី ហើយនឹងសិក្សាលទ្ធភាពក្នុងការរៀបចំផែនការបោះបង្គោលព្រំការពារឱ្យបានត្រឹមត្រូវ។
បើតាមលោក ស៊ុន មានជ័យ ប្រធានមន្ទីរវប្បធម៌ និងវិចិត្រសិល្បៈខេត្តកំពង់ស្ពឺបានឲ្យដឹងថា នៅទូទាំងខេត្តកំពង់ស្ពឺ មានសម្បត្តិបេតិកភណ្ឌវប្បធម៌ជាតិជាច្រើនត្រូវបានរកឃើញ និងបានអភិរក្សផងដែ ហើយគិតត្រឹមឆ្នាំ២០២១ បានស្រាវជ្រាវរកឃើញរហូត៤៦៤កន្លែងដែលក្នុងនោះមាន ទួលបុរាណ, ប្រាសាទ, ទីសក្ការៈបូជា, ស្រះបុរាណ, បឹងបុរាណ និងរមណីយដ្ឋានជាដើម៕
