ភ្នំពេញ៖ ក្រសួងសុខាភិបាល បានឱ្យដឹងថា ជំងឺពងបែកនៅដៃជើង និងក្នុងមាត់ ត្រូវបានរកឃើញលើកុមារ នៅតាមបណ្តាខេត្តមួយចំនួន ក្នុងប្រទេសកម្ពុជា ខណៈភាគច្រើនកើតលើកុមារ ដែលមានអាយុតិចជាង១០ឆ្នាំ។

ក្រសួងសុខាភិបាល បានឱ្យដឹងនៅព្រឹកថ្ងៃទី៩ ខែមិថុនា ឆ្នាំ២០២២នេះថា ការតាមដានជំងឺឆ្លងជាប្រចាំ មានការរកឃើញជារទេះរប៉ោះ នៃជំងឺពងបែកនៅដៃជើង និងក្នុងមាត់លើកុមារ ដែលបង្កឡើងដោយវីរុស ហើយច្រើនកើតមានចំពោះទារក និង កុមារ ភាគច្រើនលើកុមារដែលមានអាយុតិចជាង១០ឆ្នាំ ជាពិសេស កុមារអាយុក្រោម៥ឆ្នាំ។

ក្រសួងសុខាភិបាល បានឱ្យដឹងទៀតថា ជំងឺពងបែកនៅដៃជើង និងក្នុងមាត់ បង្កដោយអង់តេរ៉ូវីរុស (Enterovirus) ដែលភាគច្រើនដោយវីរុសកុកសាគី (Coxsackievirus) ហើយជាទូទៅបណ្តាលឲ្យមានជំងឺស្រាល ប៉ុន្តែជំងឺពងបែកនៅដៃជើង និងក្នុងមាត់ ក៏អាចបង្កឡើងដោយ Enterovirus 71 (EV-71) ដែលមួយចំនួនអាចបង្កឲ្យមានជាផលវិបាកធ្ងន់ធ្ងរ និងឈានដល់ស្លាប់បានដែរ។

នៅក្នុងសេចក្តីណែនាំរបស់ក្រសួងសុខាភិបាល បានបញ្ជាក់ថា មិនមានការព្យាបាលជាក់លាក់ណាមួយសម្រាប់ជំងឺពងបែកនៅដៃជើង និងក្នុងមាត់ នោះទេ ប៉ុន្តែបានណែនាំដល់អ្នកជំងឺហូបទឹកឲ្យបានច្រើន និងពេលខ្លះអាចត្រូវការព្យាបាលទៅតាមរោគសញ្ញា ដើម្បីបន្ថយគ្រុនក្ដៅដោយថ្នាំបញ្ចុះកំដៅ និង ថ្នាំបំបាត់ការឈឺចាប់ ដែលបណ្តាលមកពីដំបៅក្នុងមាត់។

ក្រសួងបានជំរុញឱ្យបង្កើនការប្រុងប្រយ័ត្នខ្ពស់ ខណៈជំងឺនេះ អាចឆ្លងពីមនុស្សម្នាក់ទៅមនុស្សម្នាក់ទៀតតាមការប៉ះពាល់ ផ្ទាល់ជាមួយ នឹងវត្ថុរាវ នៃផ្លូវដង្ហើម រួមមាន ទឹកមាត់ កំហាក ស្លេស និងសំបោរ ទឹករងៃដែលចេញពីពងបែក និង លាមកអ្នកជំងឺ៕