ភ្នំពេញ៖ សាខាគយ និងរដ្ឋាករ បាត់ដំបង បានព្រមានជាថ្មីថានឹងកម្ទេចចោល ឬដោះបំណែកជាគ្រឿងបន្លាស់ចំពោះរថយន្តចង្កូតស្ដាំ ដែលជាប្រភេទហាមឃាត់ការនាំចូល ក្នុងករណីបង្ក្រាបបាន។

យោងតាមសេចក្តីជូនដំណឹងរបស់សាខាគយ និងរដ្ឋាករបាត់ដំបង បានឱ្យដឹងថា សាខាគយនិងរដ្ឋាករខេត្តបាត់ដំបង នៅតែបន្តអនុវត្ត យុទ្ធនាការអនុគ្រោះបន្ធូរបន្ថយប្រាក់ពន្ធ អាករចំនួន១៣%លើរថយន្តចង្កូតស្តាំគ្មានពន្ធ និងអាករនាំចូលទាំងអស់មានស្រាប់ ក្នុងប្រទេសរហូតដល់ថ្ងៃទី៣០ ខែមិថុនា ឆ្នាំ២០២២ ។

ជាមួយគ្នានេះ សាខាគយ និងរដ្ឋាករខេត្តបាត់ដំបង បានរំឭកដល់ម្ចាស់រថយន្តចង្កូតស្ដាំមានស្រាប់ក្នុងប្រទេសដែលគ្មានពន្ធ និងអាករទាំងអស់ មេត្តារួសរាន់ចូលមកបំពេញកាតព្វកិច្ចពន្ធ អាករ នាំចូលទៅតាម័កាលបរិច្ឆេទដូចបានកំណត់។ 

សាខាគយ និងរដ្ឋាករខេត្តបាត់ដំបង បានលើកឡើងដែរថា នៅពេលផុតឱសានវាទ ចាប់ពីថ្ងៃទី០១ ខែកក្កដា ឆ្នាំ២០២២តទៅ សាខាគយនិងរដ្ឋាករខេត្តបាត់ដំបង នឹងចុះបង្ក្រាបនៅគ្រប់ទីកន្លែងក្នុងភូមិសាស្ត្រក្នុងខេត្តបាត់ដំបង ចំពោះរថយន្តចង្កូតឆ្វេងគ្មានពន្ធ អាករនាំចូលដែល  បង្ក្រាបបាននឹងតម្រូវឲ្យបង់ពន្ធ និងអាករ រួមទាំងពិន័យតាមបទប្បញ្ញត្តិ ជាធរមាន ។ ដោយឡែក ចំពោះរថយន្តស្ដាំដែលជាប្រភេទហាមឃាត់ការនាំចូល ក្នុងករណីបង្ក្រាបបាននឹងត្រូវកម្ទេចចោល ឬដោះបំណែកជាគ្រឿងបន្លាស់ ។

សូមបញ្ជាក់ថា រយៈពេល នៃការអនុញ្ញាតិឲ្យបង់ពន្ធ និងអាករនាំចូលដោយស្ម័គ្រចិត្ត នឹងត្រូវផុតឱសានវាទ នៅថ្ងៃទី៣០ ខែមិថុនា ឆ្នាំ២០២២ខាងមុខ៕