ភ្នំពេញ៖ យោងតាមរបាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានឱ្យដឹងថា ភាគច្រើន នៃបទល្មើសចរាចរណ៍ផ្លូវគោក តែងបង្កឡើងដោយសារអ្នកបញ្ជាម៉ូតូ។
របាយការណ៍ ស្តីពីការរឹតបន្ដឹងច្បាប់ស្ដីពីចរាចរណ៍ផ្លូវគោក បានឱ្យដឹងថា នៅថ្ងៃទី២៥ ខែឧសភា ឆ្នាំ២០២២ សមត្ថកិច្ចបានដាក់គោលដៅសរុប ចំនួន ៩០គោលដៅ ដោយក្នុងនោះមានយានយន្តចូលគោលដៅចំនួន ៨៣៥គ្រឿង ម៉ូតូ ៦៥១គ្រឿង។
របាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានឱ្យដឹងទៀតថា នៅក្នុងការអនុវត្តច្បាប់នេះ ត្រូវបានរកឃើញមានយានយន្តល្មើសសរុបចំនួន៥៩គ្រឿង រួមមាន ម៉ូតូចំនួន ៤៥គ្រឿង ត្រូវបានផាកពិន័យតាមអនុក្រឹត្យលេខ៣៩.អនក្រ.បក នៅទូទាំងប្រទេស។
ដោយឡែកក្នុងរយៈពេល២៥ថ្ងៃ (ថ្ងៃទី០១-២៥ខែឧសភា) ការរឹតបន្ដឹងការអនុវត្តច្បាប់ស្ដីពីចរាចរណ៍ផ្លូវគោក យានយន្តចូលគោលដៅមានចំនួន ៨៤.០០១គ្រឿង ក្នុងនោះរកឃើញយានយន្តល្មើសសរុបចំនួន ៩.៦៥៧គ្រឿង ម៉ូតូមានចំនួន ៨.៣១៩គ្រឿង ត្រូវបានផាកពិន័យតាមអនុក្រឹត្យលេខ៣៩ អនក្រ.បក នៅទូទាំងប្រទេស ។
របាយការណ៍ដដែលបានវាយតម្លៃថា រយៈពេល២៥ថ្ងៃ នៃខែឧសភានេះ ការអនុវត្តតាមអនុក្រឹត្យ ការផាកពិន័យយានយន្តល្មើស បានដំណើរការទៅយ៉ាងល្អប្រសើរ និងទទួលបានការគាំទ្រ ពីអ្នកប្រើប្រាស់ផ្លូវទាំងអស់ និងបានចូលរួមគោរពច្បាប់ចរាចរណ៍យ៉ាងល្អប្រសើរ ៕
