ភ្នំពេញ៖ ជនជាតិចិន ចំនួន៣នាក់ ត្រូវបានសមត្ថកិច្ច នៃមន្ទីរប្រឆាំងគ្រឿងញៀន ស្រាវជ្រាវឃាត់ខ្លួន និងរឹបអូសគ្រឿងញៀនជាង ៣០គីឡូក្រាម នៅទីតាំងសំខាន់ៗចំនួន៣កន្លែង។
របាយការណ៍ពីមន្ទីរប្រឆាំងគ្រឿងញៀន បានឱ្យដឹងថា ប្រតិបត្តិការស្រាវជ្រាវ រហូតដល់ការឃាត់ខ្លួននេះ បានធ្វើឡើងកាលពីថ្ងៃទី ១៨ ខែឧសភា ឆ្នាំ២០២២ ដោយឈានទៅបង្ក្រាបករណីកែច្នៃ ជួញដូរដោយខុសច្បាប់នូវសារធាតុញៀន នៅ៣ចំណុចផ្សេងគ្នាជាបន្តបន្ទាប់។
សមត្ថកិច្ច នៃមន្ទីរប្រឆាំងគ្រឿងញៀន បានឱ្យដឹងថា ប្រតិបត្តិការចំណុចទី១បានធ្វើឡើង នៅខុនដូបុរីប៉េងហួត (បឹងស្នោ) បន្ទប់លេខB16-16/B2 ស្ថិតនៅភូមិបឹងឈូក សង្កាត់និរោធ៍ ខណ្ឌច្បារអំពៅ រាជធានីភ្នំពេញ។ ចំណុចទី២ នៅមុខផ្សារម៉ាតហ័រណង សង្កាត់លេខ៣ ក្រុង-ខេត្តព្រះសីហនុ និងចំណុចទី៣ នៅបន្ទប់លេខ១៦០៨ នៃសណ្ឋាគារសមុទ្រខៀវ ភូមិ១ ក្រុម១ សង្កាត់លេខ៣ ក្រុង-ខេត្តព្រះសីហនុ។
ជាលទ្ធផលសមត្ថកិច្ច ឃាត់ខ្លួនជនសង្ស័យ ៣នាក់ រួមមានទី១-ឈ្មោះ CHO SHIH JIE អាយុ ៤២ឆ្នាំ ជនជាតិចិន (តៃវ៉ាន់) ២-ឈ្មោះ LI ZHI អាយុ ២៧ឆ្នាំ ជនជាតិចិន និងទី៣-ឈ្មោះ PENG ZHENGCHENG អាយុ ៣១ឆ្នាំ ជនជាតិចិន។
ជាមួយគ្នានេះដែរ សមត្ថកិច្ចចាប់យកវត្ថុតាងជាច្រើន រួមមាន៖១-ហេរ៉ូអ៊ីន ទម្ងន់ ៣គីឡូ និង ២០៦.៩៧ក្រាម, ២-ម៉្សៅក្រាមពណ៌ផ្កាឈូកខ្ចី (MDMA) ទម្ងន់៤គីឡូ និង៣៣០ក្រាម,៣-មេតំហ្វេតាមីន (ICE)ទម្ងន់៩គីឡូ ២៤៤ក្រាម, ៤- មេតំហ្វេតាមីន (WY) ទម្ងន់៦៤៨ក្រាម, ៥- កេតាមីន (Ketamine) ទម្ងន់៧គីឡូ ៩៩៣ក្រាម,៦- សារធាតុរាវ (Ketamine) ចំនួន ២១៥ ដប ទម្ងន់ ២គីឡូ ១៥០ក្រាម,៧-ថ្នាំគ្រាប់នីមេតាហ្សេប៉ាម ទម្ងន់ ២គីឡូ ៨៨២.៨៨ក្រាម,
បច្ចុប្បន្ន ជនសង្ស័យ និងវត្ថុតាង ត្រូវបានសមត្ថកិច្ចជំនាញ កសាងសំណុំរឿង បញ្ជូនទៅសាលាដំបូងរាជធានីភ្នំពេញ បន្តតាមនីតិវិធី ៕
