ភ្នំពេញ៖ គណៈកម្មាធិការជាតិ អូឡាំពិកកម្ពុជា នឹងរៀបចំក្បួនដង្ហែរទង់សហព័ន្ធកីឡាអាស៊ីអាគ្នេយ៍ និងកីឡាករ កីឡាការិនី ជ័យលាភី ពីការប្រកួតកីឡា SEA Games លើកទី៣១ ឆ្នាំ២០២២ នៅទីក្រុងហាណូយ ប្រទេសវៀតណាម ដើម្បីផ្ដល់ការគាំទ្រ ខណៈកម្ពុជា នឹងធ្វើជាម្ចាស់ផ្ទះ ក្នុងឆ្នាំ២០២៣ ខាងមុខ។

យោងតាមសេចក្តីជូនដំណឹងរបស់គណៈកម្មាធិការជាតិអូឡាំពិកកម្ពុជា បានឱ្យដឹងថា ក្បួនដង្ហែរទង់សហព័ន្ធកីឡាអាស៊ីអាគ្នេយ៍ នឹងធ្វើឡើង នៅថ្ងៃ អង្គារ ទី២៤ ខែឧសភា ឆ្នាំ២០២២ វេលាម៉ោងប្រមាណ ៥:៣០នាទីរសៀល។

គណៈកម្មាធិការជាតិអូឡាំពិកកម្ពុជា បានឱ្យដឹងដែរថា ក្បួនដង្ហែរតាមរថយន្ត នឹងចាកចេញពីព្រលានយន្តហោះអន្តរជាតិភ្នំពេញ តាមផ្លូវសហព័ន្ធរុស្ស៊ី បត់តាមផ្លូវនរោត្ដម ត្រង់មន្ទីរពេទ្យព្រះអង្គឌួង ឆ្ពោះទៅវិមានឯករាជ្យ ព័ទ្ធជុំវិញសួនវិមានឯករាជ្យខាងកើត ត្រឡប់មកផ្លូវសុរាម្រិតដល់ ផ្លូវសីហនុ រួចចូលកម្មាធិការជាតិ អូឡាំពិកកម្ពុជា។

គណៈកម្មាធិការជាតិអូឡាំពិកកម្ពុជា បានសូមឱ្យប្រជាពលរដ្ឋផ្ដល់ការគាំទ្រ និងចូលរួមអបអរសាទរដល់ដំណើរមកដល់នៃទង់ SEA Games ដើម្បីកម្ពុជា ធ្វើជាម្ចាស់ផ្ទះព្រឹត្តិការណ៍ប្រកួត SEA Games 2023 និងលើកទឹកចិត្តកីឡាករ កីឡាការិនីជ័យលាភី មេដាយប្រាក់ សំរឹទ្ធ ឱ្យបានច្រើនកុះករតាមដងផ្លូវខាងលើ។
សូមបញ្ជាក់ថា នៅក្នុងព្រឹត្តិការណ៍ប្រកួតកីឡាស៊ីហ្គេម ដែលទើបបញ្ចប់នៅប្រទេសវៀតណាម កម្ពុជាដណ្តើមបានមេដាយមាស មេដាយប្រាក់ និងមេដាយសំរិទ្ធិ សរុបចំនួន៦៣ លើ១៥ប្រភេទកីឡា ក្នុងចំណោម ៣៣ ប្រភេទកីឡា៕