ភ្នំពេញ៖ នៅក្នុងពិធីជួបសំណេះសំណាលជាមួយប្រជាពលរដ្ឋខ្មែររស់នៅប្រទេសស្វីស និងអឺរ៉ុបប្រមាណជាង ២០០០នាក់ នាថ្ងៃទី២២ ខែឧសភា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្រ្តីកម្ពុជាបានអំពាវនាវដល់ពលរដ្ឋ ត្រូវរក្សានូវភាពថ្លៃថ្នូរ កុំមានចរិតជាហិង្សាឬការគំរាមកំហែង។
ការអំពាវនាវនេះ បានធ្វើឡើងស្របគ្នានឹងគណបក្សនយោបាយចំនួន១៧ កំពុងចេញឃោសនានូវគោលនយោបាយរបស់ខ្លួនដើម្បីសុំការគាំទ្រក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥។
នៅក្នុងពិធីជួបសំណេះសំណាល សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍លើកឡើងថា ក្នុងឋានៈជានាយករដ្ឋមន្រ្តី និងជាប្រធានគណបក្ស សម្តេចក៏ចង់ឈ្នះដែរក៏ប៉ុន្តែឈ្នះយ៉ាងណាក៏ដោយក៏ត្រូវរក្សាភាពថ្លៃថ្នូរ កុំធ្វើអ្វីដែលមានចរិតជាហិង្សា ឬការគំរាមកំហែងឱ្យសោះ និងត្រូវយកគោលនយោបាយទៅប្រកួតប្រជែង ជាជាងជេរគ្នា។
សូមបញ្ជាក់ថា ដំណើរការឃោសនាបោះឆ្នោតឃុំ សង្កាត់ អាណត្តិទី៥ ត្រូវបានចាប់កាលពីថ្ងៃទី២១ ខែឧសភា រហូតដល់ថ្ងៃទី ០៣ ខែ មិថុនា ខណៈការបោះឆ្នោតក្រុមប្រឹក្សាឃុំសង្កាត់នឹងប្រព្រឹត្តទៅនៅថ្ងៃទី៥ ខែមិថុនា និងមានគណបក្សនយោបាយចំនួន១៧ បានចុះឈ្មោះចូលរួម ប្រគួតប្រជែង៕
