ភ្នំពេញ៖ អ្នកនាំពាក្យស្ថានទូតអាមេរិក ប្រចាំកម្ពុជា បានអះអាងថា រដ្ឋាភិបាល សហរដ្ឋអាមេរិក កំពុងបើកការស៊ើបអង្កេតលើករណីគប់ស្បែកជើងសំដៅ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅរដ្ឋធានីវ៉ាស៊ីនតោន។

លោក Chad Roedemeier អ្នកនាំពាក្យស្ថានទូតអាមេរិក ប្រចាំកម្ពុជា បានឆ្លើយតបនៅក្នុងលិខិតមួយកាលពីថ្ងៃទី១៩ ខែឧសភា ឆ្នាំ២០២២ថា សហរដ្ឋអាមេរិក យកចិត្តទុកដាក់បំផុតលើសុវត្ថិភាព និងសន្តិសុខរបស់អ្នកការទូតទាំងអស់ និងឥស្សរជន ដែលមកទស្សនានៅអាមេរិក។

លោកបានអះអាងថា អាមេរិកកំពុងស៊ើបអង្កេត ចំពោះឧប្បត្តិហេតុកាលពីថ្ងៃទី១១ ខែឧសភា ស្របតាមច្បាប់របស់សហរដ្ឋអាមេរិក។

គួរកត់សម្គាល់ថា ការបញ្ជាក់របស់អ្នកនាំពាក្យស្ថានទូតអាមេរិក ប្រចាំនៅកម្ពុជា បានធ្វើឡើងបន្ទាប់ពី សម្ដេចតេជោ ហ៊ុន សែន នាយករដ្ឋមន្រ្តីកម្ពុជា បានលើកឡើងអំពីករណីគប់ស្បែកជើងមកលើសម្តេច ក្នុងអំឡុងពេលដែលសម្តេចកំពុងជួបសំណេះសំណាលជាមួយពលរដ្ឋខ្មែរ នៅសហរដ្ឋអាមេរិក។

កាលពីថ្ងៃទី១៧ ខែឧសភា ឆ្នាំ២០២២ សម្ដេចតេជោ ហ៊ុន សែន បានថ្លែងថា សម្តេចរង់ចាំមើលការអនុវត្តច្បាប់នៅសហរដ្ឋអាមេរិក ចំពោះករណីគប់ស្បែកជើងនេះ៕