សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លើកឡើងបែបនេះ នៅក្នុងជំនួបពិភាក្សាការងារតាមប្រព័ន្ធវីដេអូ ជាមួយលោក នរិន្ត្រា ម៉ូឌី នាយករដ្ឋមន្ត្រីឥណ្ឌា កាលពីល្ងាចថ្ងៃទី១៨ ខែឧសភា ឆ្នាំ ២០២២។

លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានបញ្ជាក់ប្រាប់អ្នកសារព័ត៌មានក្រោយជំនួបនោះថា នៅក្នុងជំនួបនោះសម្តេចនាយករដ្ឋមន្ត្រីបានបញ្ជាក់អំពីការភ្ជាប់ទំនាក់ទំនងការទូតឡើងវិញរវាងប្រទេសកម្ពុជានិងប្រទេសឥណ្ឌា កាលពីឆ្នាំ១៩៨១ ហើយប្រទេសឥណ្ឌា គឺជាប្រទេសប្រជាធិបតេយ្យទីមួយ ដែលបានទទួលស្គាល់ និងភ្ជាប់ទំនាក់ទំនងការទូតជាមួយប្រទេសកម្ពុជា។ គិតមកដល់ឆ្នាំ២០២២ នេះមានរយៈពេល៧០ឆ្នាំហើយ។

ក្រៅពីបញ្ហានេះ ភាគីទាំងពីរបានលើកឡើងពីកិច្ចសហប្រតិបត្តិការលើវិស័យជាច្រើនទៀតទាំងទ្វេភាគីនិងពហុភាគីហើយទាក់ទងបញ្ហាទេសចរណ៍ សម្តេចតេជោ ហ៊ុន សែន បានស្នើសុំឱ្យមានការហោះហើរត្រង់ពីឥណ្ឌាមកទីក្រុងភ្នំពេញ និងមកកាន់ខេត្តសៀមរាប ក្នុងន័យធ្វើយ៉ាងណាដើម្បីឲ្យទេសចរណ៍រវាងប្រទេសទាំងពីរមានការកើនឡើង ពីព្រោះកម្ពុជាបានបើកចំហទេសចរណ៍ឡើងវិញហើយសម្រាប់អ្នកទេសចរចាក់វ៉ាក់សាំងពេញលេញ ដោយមិនចាំបាច់ធ្វើតេស្ត pcr ឬតេស្តរហ័សនោះឡើយ។

 គួរជម្រាបថា បច្ចុប្បន្នមិនទាន់មានជើងហោះហើរត្រង់រវាងប្រទេសទាំងពីរ ដូច្នេះភ្ញៀវទេសចរនិងអ្នកដំណើរ ដែលធ្វើដំណើរតាមផ្លូវអាកាស ពីប្រទេសឥណ្ឌា មកកាន់កម្ពុជា គឺត្រូវផ្លាស់ប្ដូរជជើងហោះហើរនៅប្រទេសថៃ ឬសិង្ហបុរី មុននឹងបន្តដំណើរមកដល់កម្ពុជា ៕