ការលើកឡើងរបស់រដ្ឋមន្រ្តីក្រសួងវប្បធម៌ និងវិចិត្រសិល្បៈ លោកជំទាវបណ្ឌិតសភាចារ្យ ភឿង សកុណា នៅក្នុងសិក្ខាសាលាស្តីពីតួនាទីផលិតករ សិល្បករ រួមចំណែកក្នុងការលើកកម្ពស់សីលធម៌សង្គម និងទប់ស្កាត់ អំពើហឹង្សាលើស្រ្តី និងកុមារ តាមរយៈវីដេអូខ្លី នាព្រឹកថ្ងៃទី១០ ខែឧសភា ឆ្នាំ២០២២ នេះ។
មានប្រសាសន៏នៅក្នុងពិធីនោះ លោកជំទាវបណ្ឌិតសភាចារ្យ ភឿង សកុណា បានលើកឡើងថា កន្លងមកសម្តេចតេជោនាយករដ្ឋមន្រ្តី បានផ្តល់អនុសាសន៍ណែនាំដល់ក្រសួង ស្ថាប័ន ពាក់ព័ន្ធត្រូវសហការត្រួតពិនិត្យតាមដានជាប្រចាំនូវខ្លឹមសារ រូបភាព និងការសម្តែងតាមកម្មវិធីនានា ក៏ដូចជាប្រព័ន្ធផ្សព្វផ្សាយរូបភាព និងការសម្តែងផ្ទាល់ ត្រូវមានវិធានការ និងសារក្នុងគោលដៅអប់រំ និងថែរក្សាវប្បធម៌ ប្រពៃណីដ៏ល្អផូរផង់ ប្រកបដោយកិត្តិយស សេចក្តីថ្លៃថ្នូរ ព្រមទាំងរក្សាបាននូវតម្លៃនៃអក្សរសាស្រ្តជាតិ។
លោកជំទាវបណ្ឌិតសបន្តថា បច្ចុប្បន្នវិស័យភាពយន្តនៅកម្ពុជាមានការរីកលូតលាស់ច្រើនគួរជាទីមោទនៈ ក្នុងនោះការផលិតវីដេអូកម្សាន្តនៅលើបណ្តាញសង្គមនានា ជាលក្ខណៈបុគ្គល ឬក្រុម ក៏មានច្រើនគួរឲ្យកត់សម្គាល់។ ស្របពេលជាមួយគ្នានេះ លោកជំទាវបណ្ឌិតបានមើលឃើញពីការខិតខំប្រឹងប្រែងរបស់ផលិតករ អ្នកនិពន្ធ ម្ចាស់ផលិតកម្ម និងអ្នកផលិតមាតិកាកម្សាន្តលើបណ្តាញសង្គមជាច្រើន ដែលបានផលិតជាភាពយន្ត ឬវីដេអូវែង ឬខ្លី ដែលមានការបញ្ចូលខ្លឹមសារអប់រំ ស្តីពីតម្លៃស្រ្តី និងការទប់ស្កាត់អំពើហឹង្សាលើកុមារជាដើម គឺនៅមានចំនួនតិចតួចនៅឡើយ។
បើតាមលោកជំទាវបណ្ឌិតសភាចារ្យ ភឿង សកុណា “ភាពយន្ត ឬវីដេអូមួយចំនួនបានបង្កើតឲ្យមានវប្បធម៌ហឹង្សា ការសងសឹក ការប្រើប្រាស់គ្រឿងស្រវឹង គ្រឿងញៀន និងអំពើហឹង្សាក្នុងទម្រង់ធ្ងន់ធ្ងរ ដែលជាវប្បធម៌មួយមិនល្អ នាំឲ្យក្មេងៗជំនាន់ក្រោយបែរជាយកមកចម្លង និងអនុវត្តតាម”។ ក្នុងនាមជាថ្នាក់ដឹកនាំក្រសួង លោកជំទាវបណ្ឌិត បានស្នើសុំដល់គ្រប់ភាគី ដែលពាក់ព័ន្ធក្នុងវិស័យនេះ ត្រូវខិតខំបន្ថែមទៀតក្នុងការបញ្ចូលខ្លឹមសារអប់រំ នៅក្នុងបណ្តាភាពយន្ត ចម្រៀង និងជាពិសេសបុគ្គល ឬក្រុមដែលផលិតមាតិកាកម្សាន្តលើបណ្តាញសង្គម សូមប្រកាន់ខ្ជាប់នូវវប្បធម៌អហឹង្សា និងលើកកម្ពស់ការរស់នៅប្រកបដោយភាពស៊ីវីល័យឲ្យសាកសមជាប្រទេស មានសុខសន្តិភាព និងការអភិវឌ្ឍ។
គួររំលឹកថា សិក្ខាសាលាស្តីពីតួនាទីផលិតករ សិល្បករ រួមចំណែកក្នុងការលើកកម្ពស់សីលធម៌សង្គម និងទប់ស្កាត់ អំពើហឹង្សាលើស្រ្តី និងកុមារតាមរយៈ វីដេអូខ្លី រៀបចំឡើងដោយក្រសួងវប្បធម៌ ក្នុងគោលបំណងឆ្លើយតបនឹងអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន និងអនុសាសន៍ដ៏ខ្ពង់ខ្ពស់របស់សម្តេចកិត្តិព្រឹទ្ធបណ្ឌិត ដោយមានការចូលរួមពីតំណាងក្រសួង ស្ថាប័ន និងអង្គភាព ពាក់ព័ន្ធយ៉ាងច្រើន៕ (មានជ័យ)
