ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានអំពាវនាវសុំកុំឱ្យកើតមាននូវអំពើហិង្សាណាមួយកើតឡើង នៅថ្ងៃបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលនឹងធ្វើឡើងនៅខែមិថុនា ឆ្នាំ២០២២ខាងមុខ។

មានប្រសាសន៍ក្នុងពិធីសំណេះសំណាល ជាមួយសិស្សប្រលងជាប់និទ្ទេស A នៅសាលសន្និសីទ និងពិព័រណ៍ជ្រោយចង្វារ នាព្រឹកថ្ងៃទី៣ ខែឧសភា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងថា សុំឱ្យការបោះឆ្នោតក្នុងប្រទេស ដែលនឹងប្រព្រឹត្តទៅនាពេលខាងមុខ កុំឱ្យមានអំពើហិង្សាណាមួយកើតឡើង ទោះក្នុងរូបភាពណាក៏ដោយ។

សម្តេចតេជោ មានប្រសាសន៍លើកឡើងថា ការប្រគួតប្រជែងធ្វើឡើងក្នុងដំណើរការប្រជាធិបតេយ្យធម្មតា និងមិនមែនការកាប់សម្លាប់គ្នាយកឈ្នះ យកចាញ់នោះទេ ខណៈអ្វីដែលរាជរដ្ឋាភិបាលចង់បាន គឺសុវត្ថិភាព និងបរិយាកាសនយោបាយ ដ៏ល្អប្រសើរសម្រាប់ដំណើរការប្រជាធិបតេយ្យក្នុងការបោះឆ្នោត។

សូមជម្រាបថា ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ នឹងត្រូវប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ខាងមុខ ដោយមានគណបក្សនយោបាយ ចំនួន១៧បានចុះបញ្ជី និងមានបេក្ខជនសរុប ចំនួនជាង៧ម៉ឺននាក់។

សូមបញ្ជាក់ដែរថា នាពេលថ្មីៗនេះ នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានត្រៀមកម្លាំងប្រជាការពារ ប្រមាណ១ម៉ឺននាក់ ដើម្បីជួយដល់កិច្ចការងារបោះឆ្នោត។

កម្លាំងប្រជាការពារទាំងអស់ ត្រូវបានផ្តល់អាទិភាព ក្នុងការបណ្តុះបណ្តាលលើកិច្ចការងារនេះពីសំណាក់អាជ្ញាធរ និងគណៈកម្មាការរៀបចំកាបោះឆ្នោត នៅតាមរាជធានីខេត្ត ដើម្បីធានាឱ្យបាននូវសន្តិសុខ សណ្តាប់ធ្នាប់សាធារណៈ និងសុវត្ថិភាពគ្រប់ដំណាក់កាល នៃដំណើរការបោះឆ្នោតក្រុមប្រឹក្សាឃុំ សង្កាត់ ដោយត្រូវធានាបរិយាកាសស្ងប់ស្ងាត់ គ្មានការគំរាមកំហែង គ្មានការបំភិតបំភ័យ និងគ្មានអំពើហិង្សា អព្យាក្រិត្យ សេរី ត្រឹមត្រូវ យុត្តិធម៌ សុវត្ថិភាព៕