បន្ទាយមានជ័យ៖ ច្រកទ្វាអន្តរជាតិ ប៉ោយប៉ែត-ខ្លងលឹក នឹងបើកដំណើរការជាប្រក្រតីឡើងវិញ នៅថ្ងៃទី១ ខែឧសភា ឆ្នាំ២០២២ តែស្ថិតក្រោមលក្ខណ្ឌត្រួតពិនិត្យមួយចំនួន ដើម្បីបង្ការជំងឺកូវីដ-១៩។
លោក ង៉ោ ម៉េងជ្រួន អភិបាលរង ខេត្តបន្ទាយមានជ័យ ទទួលបន្ទុកព្រំដែន បានឱ្យដឹងនៅថ្ងៃទី២៩ ខែមេសា ឆ្នាំ២០២២នេះថា នៅថ្ងៃទី១ ខែឧសភា ភាគីខេត្តស្រះកែវ ប្រទេសថៃ នឹងចាប់ផ្តើមដំណើរការច្រកទ្វាអន្តរជាតិ ខ្លងលឹក-ប៉ោយប៉ែត ឡើងវិញ ក្រោយអាក់ខានដោយសារការរីករាលដាលជំងឺកូវីដ-១៩ នាពេលកន្លងទៅ។
លោកបានបញ្ជាក់ថា ដំណើការ នៃការបើកច្រកទ្វាអន្តរជាតិ ខ្លងលឹក-ប៉ោយប៉ែត ឡើងវិញ នឹងតម្រូវឱ្យអ្នកធ្វើដំណើរឆ្លងកាត់ មានលិខិតឆ្លងដែន ប័ណ្ណព្រំដែន និងការភ្ជាប់ជាមួយកាតចាក់វ៉ាក់សាំង បង្ការជំងឺកូវីដ-១៩ តាមគោលការណ៍របស់ក្រសួងសុខាភិបាល។
យ៉ាងណាក៏ដោយ លោក ង៉ោ ម៉េងជ្រួន បានលើកឡើងថា អាជ្ញាធរកម្ពុជា និងថៃ នឹងពិភាក្សាគ្នាបន្ថែមទៀត ដើម្បីបង្កើនកិច្ចសហប្រតិបត្តិការ ដោយធ្វើយ៉ាងណា ឱ្យដំណើការ នៃការបើកច្រកទ្វាអន្តរជាតិប៉ោយប៉ែត ឡើងវិញ កាន់តែល្អប្រសើរ។
សូមបញ្ជាក់ថា នាពេលកន្លងទៅ អាជ្ញាធរខេត្តស្រះកែវ ប្រទេសថៃ បានបិទច្រកទ្វា ខ្លងលឹក-ប៉ោយប៉ែត ក្រោយពេលមានការរីករាលដាលជំងឺកូវីដ-១៩ ខណៈភាគីអាជ្ញាធរខេត្តបន្ទាយមានជ័យ ពុំបានបិទច្រកទ្វាអន្តរជាតិ ប៉ោយប៉ែត នោះទេ ប៉ុន្តែបានរឹតបន្តឹងការចូលមកកម្ពុជា ដើម្បីបង្ការជំងឺកូវីដ-១៩៕
