ភ្នំពេញ៖ រដ្ឋមន្រ្តីក្រសួងទេសចរណ៍ បានជំរុញដល់ឯកអគ្គរដ្ឋទូតថ្មី នៃសាធារណរដ្ឋម៉ាល់ឌីវ ប្រចាំកម្ពុជាឱ្យពិនិត្យលទ្ឋភាពក្នុងការបង្កើនកិច្ចសហប្រតិបត្តិការលើវិស័យទេសចរណ៍ តាមរយៈការតភ្ជាប់ជើងហោះហើរ ដើម្បីជួយគាំទ្រគ្នាទៅវិញទៅមកក្នុងកម្រិតទេសចរណ៍អន្តរជាតិ។

យោងតាមក្រសួងទេសចរណ៍ បានឱ្យដឹងថា នៅក្នុងជំនួបពិភាក្សាករងាររវាងលោក ថោង ខុន រដ្ឋមន្រ្តីក្រសួងទេសចរណ៍ ជាមួយលោក Mohamed Jinah ឯកអគ្គរដ្ឋទូតថ្មី នៃសាធារណរដ្ឋម៉ាល់ឌីវ ប្រចាំកម្ពុជាដែលមាននិវេសនដ្ឋាននៅរាជធានីបាងកក ប្រទេសថៃ កាលពីរសៀលថ្ងៃទី២៦ ខែមេសា ឆ្នាំ២០២២ ភាគីទាំងពីរ បានផ្តោតជាសំខាន់ នៃកិច្ចសហប្រតិបត្តិការទេសចរណ៍។

នៅក្នុងជំនួបនេះដែរ លោក ថោង ខុន បានប្រាប់ឯកអគ្គរដ្ឋទូត ម៉ាល់ឌីវ ថា ភ្ញៀវទេសចរបរទេសអាចចូលមកកម្ពុជាបានដោយគ្រាន់តែបង្ហាញកាតចាក់វ៉ាក់សាំងប៉ុណ្ណោះ ខណៈស្ថានភាពនេះ គឺមានតែកម្ពុជាទេដែលឈានមុខគេក្នុងការបើកទទួលភ្ញៀវទេសចរអន្តរជាតិ។

លោករដ្ឋមន្ត្រី ថោង ខុន ក៏បានស្នើសុំនិងមានការឯកភាពគ្នាគឺធ្វើយ៉ាងម៉េចជំរុញឱ្យមានការហោះហើរទៅវិញទៅមកផងដែរ។ភាគីទាំងពីរក៏បានឯកភាពគ្នារៀបចំឱ្យមានជាសេចក្ដីព្រាងអនុស្សរណៈយោគយល់ស្តីពីកិច្ចសហប្រតិបត្តិការលើវិស័យទេសចរណ៍ នៃប្រទេសទាំងពីរ ហើយត្រៀមចុះហត្ថលេខាលើកិច្ចព្រមព្រៀង Air Service Agreement នាពេលខាងមុខដើម្បីបើកផ្លូវឱ្យកាន់តែទូលំទូលាយថែមទៀត ក្នុងការពង្រឹងនិងពង្រីកកិច្ចសហប្រតិបត្តិការទេសចរណ៍រវាងប្រទេសទាំងពីរផងដែរ៕