កំពង់ឆ្នាំង៖ បុរសចំនួន៣នាក់ ពាក់កាតសារព័ត៌មាន និងអ្នកបើកបរម្នាក់ ត្រូវបានសមត្ថកិច្ចខេត្តកំពង់ឆ្នាំង ឃាត់ខ្លួន តាមពាក្យបណ្តឹងរបស់ពលរដ្ឋ ពីបទ រំលោភលំនៅឋាន កាលពីថ្ងៃទី២១ ខែមេសា ឆ្នាំ២០២២។
របាយការណ៍របស់ស្នងការដ្ឋាននគរបាលខេត្តកំពង់ឆ្នាំង បានឲ្យដឹងថា ជនសង្ស័យទាំង ៤នាក់ដែលត្រូវឃាត់ខ្លួន រួមមាន៖១,ឈ្មោះ សាយ រស្មី អាយុ ៣១ឆ្នាំ មានទីលំនៅក្នុងភូមិកណ្តាល ឃុំបន្ទាយដែក ស្រុកគៀនស្វាយ ខេត្តកណ្តាល ជាអ្នកយកព័ត៌មាន រស្មីស្ទឹងត្រង់។ ២, ឈ្មោះ ទួន ឈុនលី អាយុ ៥២ឆ្នាំ មានទីលំនៅក្នុងភូមិកណ្តាល ឃុំបន្ទាយដែក ស្រុកគៀនស្វាយ ខេត្តកណ្តាល ជាអ្នកសារព័ត៌មាន រស្មីស្ទឹងត្រង់។ ៣,ឈ្មោះ មិន ធី អាយុ៤៣ឆ្នាំ មានទីនៅក្នុងភូមិកណ្តាលលើ ឃុំបន្ទាយដែក ស្រុកគៀនស្វាយខេត្តកណ្តាល ជាអ្នកសារព័ត៌មាន រស្មីបន្ទាយដែក និងទី៤,ឈ្មោះ ប៊ុត ចន្ថា អាយុ ៦៥ឆ្នាំ មានទីលំនៅក្នុងភូមិព្រៃមាន់ ឃុំព្រៃពួច ស្រុកអង្គស្នួលខេត្តកណ្តាល ជាអ្នកបើកបររថយន្ត។
តាមការឱ្យដឹងពីលោក អៀរ ប៊ុនធឿន ស្នងការរង នគរបាលខេត្តកំពង់ឆ្នាំង បានបញ្ជាក់ថា អ្នកទាំង៤នាក់នេះ ត្រូវបានចោទពីបទ រំលោភលំនៅឋាន តាមមាត្រា២៩៩ និងបទជ្រៀតជ្រែកដោយខុសច្បាប់ ទៅក្នុងការបំពេញមុខងារ ជាសាធារណៈ តាមមាត្រា៩០៦ នៃក្រម ព្រហ្មទណ្ឌ។
លោកបានឱ្យដឹងដែរថា សមត្ថកិច្ចនឹងកសាងសំណុំរឿង បញ្ជូនពួកគេទៅកាន់សាលាដំបូងខេត្ត ចាត់ការបន្តតាមនតិវិធីច្បាប់៕
