ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា នឹងអញ្ជើញសម្ពោធគម្រោងការពារទឹកជំនន់ និងកែលម្អប្រឡាយលូ ជំហានទី៤ ក្នុងខណ្ឌដូនពេញ រាជធានីភ្នំពេញ នៅព្រឹកថ្ងៃទី២០ ខែមេសា ឆ្នាំ២០២២ ស្អែកនេះ។

គម្រោងការពារទឹកជំនន់ និងការកែលម្អប្រព័ន្ធប្រឡាយ-លូ ជំហានទី៤នេះ សាងសង់ក្រោមជំនួយឥតសំណងរបស់ជប៉ុន មានតម្លៃជិត៤០លានដុល្លារអាមេរិក ត្រូវបានបញ្ចប់ជាស្ថាពរ។ 

សូមបញ្ជាក់ថា គម្រោងនេះ រួមមាន៖ការដាក់លូមេ ដែលមានទំហំអង្កត់ផ្ចិត ១,៥ម៉ែត្រ ដល់ ២,៣ម៉ែត្រ ការសាងសង់អាងក្រោមដីទំហំ ៦៥.០០០ម៉ែត្រគូប (បណ្តោយ ១៣៥ម៉ែត្រ ទទឹង ១៣ម៉ែត្រ និងជម្រៅ ៤ម៉ែត្រ) និងសាងសង់ស្ថានីយបូមទឹកថ្មី មានសមត្ថភាពបូមទឹក ១,៤ម៉ែត្រគូប ក្នុង១វិនាទី។ គម្រោងនេះ នឹងដោះស្រាយបញ្ហាទឹកលិចនៅតំបន់ជុំវិញខណ្ឌដូនពេញរហូតដល់ខណ្ឌទួលគោក និងខាងជើងវត្តភ្នំ។ 

របាយការណ៍ពីអង្គការJICA របស់ជប៉ុន បានលើកឡើងថា ចាប់តាំងពីឆ្នាំ១៩៩៨ មក ខ្លួនបានផ្តល់កិច្ចសហប្រតិបត្តិការជាមួយរាជរដ្ឋាភិបាលកម្ពុជា ជួយដល់ទីក្រុងភ្នំពេញ ក្នុងការកាត់បន្ថយផលប៉ះពាល់ដោយការជន់លិចដោយជំនន់ទឹកភ្លៀង។ ជាមួយគ្នានេះ អង្គការJICA បានអំពាវនាវដល់អ្នករស់នៅក្រុងភ្នំពេញ ឱ្យឈប់បោះចោលសំរាមតាមផ្លូវ ដើម្បីរក្សាទម្លាប់ សណ្ដាប់ធ្នាប់ល្អ និងការបង្ការការជន់លិច ទោះជាមានប្រព័ន្ធការពារទឹកជំនន់ថ្មីនេះក៏ដោយ៕

អត្ថបទ៖លាង ឡា