ភ្នំពេញ៖ រដ្ឋមន្ត្រីក្រសួងទេសចរណ៍ បានឱ្យដឹងថា ខេត្តបាត់ដំបង បានក្លាយជាគោលដៅអ្នកទេសចរដើរកម្សាន្តច្រើនជាងគេ ខណៈខេត្តសៀមរាប ស្ថិតនៅក្នុងលំដាប់ទី៤ នៃអ្នកដើរកម្សាន្តក្នុងឱកាសពិធីបុណ្យចូលឆ្នាំខ្មែរ រយៈពេល៣ថ្ងៃ បូកទាំងថ្ងៃអាទិត្យ១ថ្ងៃទៀត។
លោក ថោង ខុន រដ្ឋមន្ត្រីក្រសួងទេសចរណ៍ បានឱ្យដឹងថា គោលដៅទេសចរណ៍សំខាន់ៗ រយៈពេល៤ថ្ងៃនេះ រួមមាន៖១/ខេត្តបាត់ដំបង ៦៥៣,៨៩៦នាក់,២/ខេត្តកំពង់ចាម ៥៤១,៩០០នាក់,៣/ខេត្តបន្ទាយមានជ័យ ៤៧១,១១៩នាក់,៤/ខេត្តសៀមរាប ៤៥៥,៩៨៤នាក់,៥/ខេត្តព្រៃវែង ៣៩៦,៣២៨នាក់,៦/ខេត្តកំពង់ស្ពឺ ៣៤៥,០១៨នាក់,៧/ខេត្តពោធិ៍សាត់ ៣៣៨,៩១៦នាក់,៨/ខេត្តកំពង់ឆ្នាំង ៣០០,៥៦១នាក់,៩/ខេត្តកំពត ២៨៤,៨៩៣នាក់,១០/ខេត្តព្រះសីហនុ ២៦៤,៣០៨នាក់,១១/រាជធានីភ្នំពេញ ២៤០,៤៦០នាក់។
លោក ថោង ខុន បានបញ្ជាក់ថា ចំនួនភ្ញៀវទេសចរប្រមាណជាង៥លាន១៧ម៉ឺននាក់ ក្នុងរយៈពេល៤ថ្ងៃនេះ គឺជាចំនួនមួយដ៏ច្រើនលើសពីការរំពឹងទុក និងជាចំនួនខ្ពស់ ចាប់តាំងពីរាជរដ្ឋាភិបាល បានប្រកាសបិទបញ្ចប់ព្រឹត្តិការណ៍សហគមន៍នាអំឡុងខែធ្នូ ឆ្នាំ២០២១ ខណៈដែលពិធីបុណ្យឆ្លងឆ្នាំសកលកន្លងមក ភ្ញៀវសរុបមានប្រមាណ២លាននាក់ ហើយពិធីបុណ្យចូលឆ្នាំចិន ភ្ញៀវសរុបមានប្រមាណ៩៤ម៉ឺននាក់។
រដ្ឋមន្ត្រីក្រសួងទេសចរណ៍ បានលើកឡើងថា ចរន្តភ្ញៀវទេសចរដ៏ច្រើននេះ បានបង្កើតជាផលប្រយោជន៍សេដ្ចកិច្ចដ៏ច្រើនទាំងនៅថ្នាក់ជាតិ និងនៅតាមមូលដ្ឋាន ខណៈបណ្តាសណ្ឋាគារ ប៊ូទិក ផ្ទះសំណាក់ និងសេវាស្នាក់នៅផ្សេងៗនៅស្ទើរគ្រប់ខេត្ត ដែលមានលទ្ធភាពបើកអាជីវកម្មឡើងវិញ បានទទួលការកក់ពេញស្ទើរ១០០ភាគរយ៕
