ភ្នំពេញ៖ បាតុភូតទែម៉ូឌីណាមិច ដែលកើតឡើងពីឥទ្ឋិពលជ្រលងសម្ពាធទាប ក្នុងកម្រិតពីខ្សោយទៅមធ្យម ប៉ះនិងសីតុណ្ហភាពផ្ទៃដីឡើងកំដៅ នឹងបង្កឱ្យមានភ្លៀង ផ្គរ រន្ទះ និងខ្យល់កន្រ្តាក់។យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម បានឱ្យដឹងថា ឥទ្ឋិពលនេះ នឹងកើតឡើងនៅថ្ងៃទី១៣-១៦ ខែមេសា ប៉ុន្តែចាប់ពីថ្ងៃទី១៧-១៩ ខែមេសា សីតុណ្ហភាពអតិបរិមា និងភ្លៀង ក៏នឹងចុះថមថយបន្តិចវិញដែរ។

ក្រសួងឱ្យដឹងបន្តថា ស្ថានភាពបែបនេះ នឹងធ្វើឲ្យបណ្តាខេត្តនៅតំបន់វាលទំនាបកណ្ដាល មានសីតុណ្ហភាពអប្បបរមា ពី ២៤-២៧អង្សាសេ និងសីតុណ្ហភាពអតិបរមា ពី ៣៥-៣៧អង្សាសេ ហើយក្នុងចន្លោះពីថ្ងៃទី១៣-១៧ ខែមេសា អាចមានភ្លៀងក្នុងកម្រិតខ្សោយទៅច្រើន លាយឡំទៅដោយផ្គរ រន្ទះ និងខ្យល់កន្រ្តាក់។ក្រសួងឱ្យដឹងបន្តទៀតថា បណ្តាខេត្តជាប់ជួរភ្នំដងរែក និងខ្ពង់រាបឦសាន សីតុណ្ហភាពអប្បបរមា មានពី ២៣-២៥អង្សាសេ និងសីតុណ្ហភាពអតិបរមា មានពី ៣៤-៣៧អង្សាសេ ហើយក្នុងចន្លោះពីថ្ងៃទី១៣-១៧ ខែមេសា អាចមានភ្លៀងក្នុងកម្រិតខ្សោយទៅច្រើន លាយឡំទៅដោយផ្គរ រន្ទះ និងខ្យល់កន្រ្តាក់។ដោយឡែកនៅតំបន់មាត់សមុទ្រ សីតុណ្ហភាពអប្បបរមា មានពី ២២-២៥អង្សាសេ និងសីតុណ្ហភាពអតិបរមា មានពី ៣០-៣៣អង្សាសេ ហើយក្នុងចន្លោះពីថ្ងៃទី១៣-១៧ ខែមេសា អាចមានភ្លៀងក្នុងកម្រិតខ្សោយទៅច្រើន លាយឡំទៅដោយផ្គរ រន្ទះ និងខ្យល់កន្រ្តាក់៕